Ikasturte amaierako kontzertua egingo du Toberak bihar
Tobera Musika eta Dantza Eskolak ikasturte amaierako kontzertua egingo du bihar Seguran. Diplomak banatu eta afari-merienda egingo dute.
Tobera Musika eta Dantza Eskolak ikasturte amaierako kontzertua egingo du bihar, 18:30ean, Seguran. Kontzertuetan diplomak banatuko dituzte, eta amaieran, afari-merienda izango da partaideentzat. Plazan izango da, eta euria egingo balu, Botikaxaharren. Kontzertuen aurretik, 18:00etatik 18:30era, Batukada erakustaldia egingo dute herrian barrena Zaldibiako batukada feministak eta Toberako batukada ikasleek.
Doako autobusa jarriko dute Zegamako ikasleentzat. 17:40ean irtengo da Zegamako geralekutik, eta itzulera Seguratik 20:25ean izango da. Harri Garciak eta Nora Arraizak aurkeztuko dute saioa. 15 abesti prestatu dituzte ikasleek kontzerturako: tartean, Huntzaren Olatu bat, Brigade Locoren Bultzada, Rolling Stones-en Satisfaction, Guns&Roses-en Sweet Child O Mine, Ed Sheeran-en Afterglow, Loch Lomond Ingalaterrako doinu tradizionala, Bulegoren Kantu bat, Kaxianoren Itsasontzi baten edota Oskorriren Atxiketan Potxiketan.
Hilaren 21ean Zegaman
Musikaren Nazioarteko Egunean, berriz, hilaren 21ean, Zegaman egingo dute ikasturte amaierako kontzertua, Haritz Egimendiak eta Paula Egimendiak aurkeztuta. Horretarako ere autobus zerbitzua izango da Zegamatik kanpoko ikasleentzat.
