Ormaiztegiko Harrikalariak Gazte Asanbladak I. Gazte Eguna antolatu du biharko
Kuadrilla arteko jolasak, sagardo dastaketa, herri bazkaria eta kontzertuak egongo dira. Gazte Asanbladako talde berriak antolatzen duen lehenengo gazte eguna izango da asteburukoa
Arene6 eta Toc (irudian) taldeek joko dute bihar, Ormaiztegin. Ormaiztiko Harrikalariak Gazte Asanbladak antolatuta, I. Gazte Eune ospatuko dute bihar Ormaiztegin, herritar guztientzat. Eguerditik hasi eta gauera arteko egitaraua prestatu dute. Kuadrila jolasak, herri bazkaria, sagardo dastaketa eta kontzertuak izango dira. Gazte Asanbladako talde berriak antolatzen duen lehenengo gazte eguna da.
Herrian parranda egiteko eta jai giroa sortzeko aukera zabaltzeko antolatu dute eguna. «Jai aldetik bi ekitaldi dauzkagu, herriko festak eta San Migel eguna, eta iruditu zitzaigun bi ekitaldi gazteentzat zein herritarrentzat orokorrean gutxiegi zela», azaldu du Julen Zabalo asanbladako kideak. Asteburuan jarduera aldetik hutsik zegoela ikusita, bihar egitea erabaki dute. Herritar guztiei zuzendutako eguna izango da: «Nahiz eta gazte eguna izena eduki, herri guztiarentzat eta inguruko herrietako jendearentzat ere bada».
Jolasak nahi dutenentzat
Eguerdian kuadrila jolasak egingo dituzte. Dagoeneko lau talde animatu dira parte hartzera, baina edonork parte hartu dezake, momentuan bertan izena emanda. Zaku lasterketa, sokatira edo oskol/txupito bilketa bezalako jolasak izango dira.
Sagardo dastaketan Tolosako Aldaba txiki auzoko Isastegi, Azpeitiko Añota eta Ataungo Urbitarte sagardotegietako sagardoak eskainiko dituzte. Txozna ere egongo da. Jarduera guztiak herriko plazan egingo dituzte, elizatari ondoko eremuan. Karpa erabiliko dute bazkaria bertan egiteko. Gauean, mahaiak kendu, barra jarri eta bertan segiko du festa giroak, kontzertuak amaitu arte.
Gazte eguneko egitaraua
· 12:00. Kuadrilla arteko jolasak nahi duten herritarrentzat: zaku lasterketa, sokatira, txupito bilketa… Ez da beharrezkoa izenik ematea.
· 14:30. Herri bazkaria plazako karpan.
· 19:00. Hiru sagardotegitako sagardo dastaketa: Isastegi, Añota eta Urbitarte.
· 23:00. Kontzertuak txozna gunean: Arene 6, eta Toc taldeak.
DJ bat ere egongo da, festa girotzeko.
