Emakumeak protagonista Aiako Santixabel jaietako igandean
Emakume sortzaileen azoka egin dute Bibloetak Ataungo emakume taldearen ekimenez Aiako Santixabel Jaietako igande goizean.
Aiako Santixabeletan ume zein heldu, ez da dibertsiorik falta izan. Puzgarriak, sagardo eta sardina dastaketa, herri bazkari zein afariak, ikuskizunak, musika eskaintza… Ez da ezer ere falta izan Aian asteburuan zehar, ostiraletik iganderako egitarau ederra antolatu baitu Aiako Jai Batzordeak. Musika eskaintzari dagokionean, Los Zopilotes Txirriaos eta Unidad Alavesa taldeak izan dira jende gehien erakarri dutenak eta plaza lepo betetzea lortu zuten larunbat gauean.
Emakume sortzaileen azoka
Aurtengo jaietako berrikuntza nabarmenena emakume sortzaileen azoka izan da. Igande goizean egin dute, Aterpean, eta goizeko 11:30ak aldera ireki dituzte ateak. Ekimen hau Ataungo Biboletak Emakume Taldeak antolatu du, haiek esan bezala, herrian “sekulako artistak” dituztela eta hauei ikusgaitasuna emateko asmoz. Aspalditik zuten buruan ekimen hau, martxoaren 8aren bueltan egitea bururatu baitzitzaien, baina herriko jaietan egitea erabaki zuten azkenean, jai-giroak jende gehiago erakarriko zuelakoan.
Duela hiruzpalau hilabete zabaldu zuten izen-emateko deialdia eta guztira 8 emakumek eman dute izena, gehienak ataundarrak; beraz, herritarrak izan dira nagusi. Azoka izateaz gain erakusleiho ederra ere izan da herriko sortzaileentzat. Denetik topatu ahal izan dute azokan bertaratu direnek: jostailuak, margolanak, bitxiak, marrazkiak, arropa, ontziak…
Biboletak Emakuke Taldeak ere aktiboki parte hartu du azokan, sortu berri duten materiala salgai jarriz lehen aldiz. Poltsak eta zapiak egin dituzte eta pegatez lagunduta haien postutxoa osatu dute azokan. Poltsa hauetako irudia ere herriko emakume sortzaile batek egina da.
Gaur arratsaldean emango diete amaiera jaiei, dantza eta pilota uztartuz. Lehenik eta behin, arratsaldeko 17:00etan 34.Dantzari Txiki Txapelketa izango dute eta jarraian, pelota partiduei pasako diete lekukoa. Lehenengo alebinen txanda izango da: H.Aldasorok eta M.Aldasorok A.Aramendiren eta U.Agirreurretaren aurka jokatuko dute. Ondoren, V. Aiako Pilota Txapelketa Herrikoiko finalak jokatuko dira eta jubenilen pilota partidarekin emango zaie agurra aurtengo Aiako Santixabel Jaiei.
