Merkealdiko produktuak kalera aterako dituzte gaur merkatariek
Egun osoan zehar puzgarriak egongo dira, eguerdian paella errazioak banatuko dira bezeroen artean eta arratsaldean Txan Magoak ikuskizuna egingo du
Bi-Tartean merkatari elkarteak Merkealdia Kalera egitasmoa egingo du gaur, 10:00etatik 20:00etara (eguerdian ez da itxiko), Zumarragako Zelai Arizti pilotalekuko karpan. Hainbat merkatarik denda kanpoan egingo dute.
Hamabi merkatari egongo dira Zelai Ariztiko karpan eta beste hamazazpi merkatarik denda aurrera aterako dituzte euren dendetako gaiak. Guztira 27 izango dira parte hartzaileak. Karpan, Alex Kirolak, Naif, Kuxkux, Ezpeleta argidenda, Marai&NKN, Bidegorri, Titare, Stylo Gorane Dominguez, Aitxu, Kuttun, Beloki eta Opticalia Urretxu egongo dira.
Produktuak denda aurrera aterako dituztenak, berriz, ATA harategia, Julita mertzeria, Mari mertzeria, Baby, Urdangarin burdindegia, Otxaran, Santa Cruz margoak, Natalietta, Oskarbi, Mentxu y Yone, Arku, Doss, Amane, AM mertzeria, La Perla Etxea, Xarmanki eta Aitxu izango dira.
Paella errazioak
Merkealdia Kalera egitasmoan parte hartuko duten merkatariek txartelak banatuko dituzte goizean zehar 20 euroko gastua egiten duten bezeroen artean. Eguerdian, 13:30ak aldera, paella errazioak banatuko dituzte txartel horien truke.
Gainera, egun osoan zehar ekitaldiak egongo dira Zelai Arizti parkean: musika entzungo da megafonia bidez egun guztian zehar, haurrentzako puzgarriak egongo dira 10:00etatik 13:00etara eta 17:00etatik 19:00etara eta 19:00etan Txan Magoaren ikuskizuna egongo da.
Merkealdia Kalera ez da Bi-Tartean merkatari elkarteak eskuartean duen egitasmo bakarra. Duela aste batzuk praka bakero zaharrak jaso zituen eta Mairi emakumeen elkartea mantalak egiten ari da praka horiekin. Mantal horietako batzuk bi herrietako elkarteei oparituko dizkiete. Mantal horiek elkartearen izena eramango dute. Beste mantal batzuk, berriz, herriko artistei emango dizkiete. Artistek mantal horiek apainduko dituzte. Herriko artistek apaindutako mantalak Bi-Tartean merkatari elkarteko denden bezeroen artean zozkatuko dituzte.
