Uxue Kerejetak kontzertua egingo du larunbatean Eitzan
Musikari zumarragarrak bere auzoan joko du, Eitzako Jai Batzordeak antolatutako kontzertuan.
Uxue Kerejeta musikari zumarragarrak kontzertua egingo du larunbatean, 19:00etan, Eitzako Korta tabernako plazan. Ekitaldi hau Eitzako Jai batzordeak antolatu du.
Kerejetari ilusio handia egiten dio Eitzan jotzeak, bera bertakoa baita. «Jai batzordeak bertan jotzea eskaini zidanean, ez nuen bi aldiz pentsatu. Nire auzoa da eta ilusio handia egiten dit bertan jotzeak».
Kontzertu «lasaia» izango dela dio. «Kontzertu lasaia izango da. Ikusleek nahi bezala jarraitu ahal izango dute: zutik edo eserita. Gainera, nahi dutenek abesteko aukera edukiko dute», aipatu du.
Abesti ezagunak
Izaro, Zea Mays, Xabi Bandini, Izal eta Ken Zazpiren abesti ezagunak joko ditu, besteak beste. Baita berak konposatutako abestiak ere.
Gaztea irratiaren cover lehiaketan izandako arrakasta dela eta, Kerejetak hainbat kontzertu eskaini ditu azkenaldian. Zumarragako jaietan jo zuen eta gaur Argixao adinekoen egoitzan joko du.
