Neurria hartua dio klasikoari
Abaltzisketako azken igoeran erasoa jo eta bakarrik iritsi da helmugara Simon Yates. Bigarren txapela du. Gorka Izagirre izan da tropeleko goierritar bakarra
Simon Yatesek irabazi zuen Ordiziako Klasikoa, atzo. Bigarren txapela du, 2016an ere bereganatu baitzuen. Plana orduko hartan ongi irten bazen zertarako aldatu: «Ondo ezagutzen dut ibilbidea eta nire unea aukeratu dut. Duela sei urte erasoa jo nuen toki berean jo dut», azaldu zuen txirrindulari britainiarrak helmuga marra zeharkatu berritan. Abaltzisketako azken igoeran egin zuen eraso, hamar kilometroren faltan, eta ezin izan zion inork jarraitu. Bakarrik helmugaratu zen, 2016an bezala.
Hamar segundo atera zizkion tropelari. Dion Smith Team BikeExchange Jayco taldeko lagunak irabazi zuen bigarren posturako esprinta, eta Xavier Canellasek egin zuen hirugarren. 25 bat txirrindulari helmugaratu ziren batera eta tartean zen Pablo Lastra bilbotarra. Bera izan zen lehen euskal herritarra.
Lasterketa hasi eta berehala Alexander Catafordek, Marcos Juradok eta Julen Irizarrek ihes egin zuten; Edwin Torres eta David Martin batu zitazkien geroago. Halako batean, Irizarrek oreka galdu zuen eta Cataford ere lurrera bota zuen. Zorionez, erorikoak ez zuen ondorio larririk izan, baina ihesaldian bost zirenean ez bazuten sekula alde handirik lortu, hiru gelditu zirenean tropelak segituan irentsi zituen. Behin danak elkarrekin zirenean, azken aurreko itzulian, Yates, Juan Ayuso eta Samuele Battistella aurrera egiten saiatu ziren eta kilometro mordoxka batean eutsi zioten pultsuari. Harrapatu egin zituzten, baina Yates indartsu zegoen oraindik eta Abaltzisketako azken igoera beste inork baino azkarrago egin zuen. Are, marka berria ezarri du: 5:37 behar izan zuen Amezketako bidegurutzetik Abaltzisketako sarrerara arteko ia hiru kilometroak egiteko. Ampo saria ere bereganatu zuen, hortaz.
Yatesek neurria ondo baino hobeto hartua dio klasikoari. «Lasterketa oso ondo datorkit. Igoeren luzera ona da nire ezaugarrietarako», aitortu zuen. Hiru bider hartu du parte eta hiruretan lasterketa buruan sartu da helmugara: 2018an Robert Power taldekideari irabazten utzi zion eta bigarren egin zuen. «Ziur nago itzuliko naizela», esanez agurtu zen.
«Ezin gara zoriontsuago izan», gaineratu zuen Gene Bates Bike Exchange – Jayco taldeko zuzendariak. «Itxaropentsu etorri gara, baina lasterketa txikiago hauek irabaztea batzuetan oso zaila da. World Tour mailako bost talde geunden. Pozik gaude gaurko emaitzarekin». Taldekako lehia beraiek irabazi zuten.
Goi mailako txirrindulariak
Yatesek Espainiako Vueltako sailkapen nagusia irabazia du eta hiru itzuli handietan ditu garaipenak, besteak beste. Halere, berea baino palmares hobea duten txirrindularien aurka aritu zen atzokoan. Izan ere, Ordiziako Klasikoak goi mailako partaidetza izan zuen. Vincenzo Nibali Giroko, Tourreko eta Vueltako eta bi monumentuetako baten garailea bertan izan zen, adibidez. Txirrindularitza urte amaieran utziko duenez eta Ordiziara gehiago etorriko ez denez, festetako zapi bat oparitu zioten oroigarri gisa. Zaleek ere aukera aprobetxatu zuten eta argazkiak eskatu zikioten. Parranda zaleek giro polita sortu zuten lasterketa hasi baino lehen.
Horren parte hartze ona izan zuen, hein handi batean, Nazioarteko txirrindularitza elkargoak ezarritako puntuazio sistemagatik. Hau da, lortutako puntuen arabera lehen mailako taldeak berritu egiten dira hiru urtez behin. Inork ez du maila galdu nahi, lasterketa onenetan egoteko eskubidea ematen duelako, eta zerrenda aurten berrituko denez, handik eta hemendik ahalik eta puntu gehien pilatzen dabiltza taldeak.
Gorka Izagirreri ere eragin dio puntu beharrak. Frantziako Tourreko azken etapari uko egin behar izan zion eta azken orduan Ordiziara etorri zen, Alejandro Valverde taldekidearen hutsunea estaltzeko. Lasterketa ez zitzaion nahi bezala atera, ordea. 38. postuan amaitu zuen, irabazlearengandik 1:15era. Lehen goierritarra izan zen, dena den. Parte hartu zuen goierritar bakarra izan zen.
