Lopez eta Rosado buru
Joseba Lopez gasteiztarrak irabazi du 23 eta 27 urtez azpikoen Zegamako San Bartolome txirrindulari proba. Junior mailako Beasain Proban, aldiz, Abel Rosado valentziarra izan da garaile
Txirrindularitza proba bana jokatu da Zegaman eta Beasainen asteburuan, kategoria ezberdinetan. Batetik, Zegamako 90. San Bartolome txirrindularitza proba larunbatean jokatu da eta baliagarria izan da Lehendakari Txapelketarako, 23 eta 27 urtez azpikoen mailan. Caja Rural taldeko Joseba Lopez gasteiztarrak irabazi du lasterketa. Bestetik, Beasain 41. proba igandean izan da eta Bathco taldeko Abel Rosado valentziarra helmugaratu da lehen postuan.
Zegamako lasterketa azkeneko metroetan erabaki da. Talde txiki batean heldu dira hainbat ziklista, eta Lopez sprintean nagusitu da. Bigarren postua Telcom taldeko Edgar Cadenak lortu du, eta hirugarrena Caja Ruraleko Mulu Hailemichaelek.
Mendiko saria Laboral Kutxako Iñaki Muruarentzat izan da, eta taldekakoa Caja Ruralentzat. 118 kilometroko ibilbidea egin dute txirrindulariek. Lehendakari txapelketan Haidemichaelek jarraitzen du lider.
Lehia estua
Beasaingo lasterketa ere ez da erabaki azken unera arte. Abel Rosado Sakana Group taldeko Mikel Uncillarekin batera helmugaratu da ia. Azken zatian Rosado gailendu da. Hirugarren iritsi den MMR-Academy tadeko Markel Beloki ere segidan helmugaratu da, bi segundoko tartearekin.
Mendiko lehen saria bigarren sailkatuarentzat izan da, Mikel Uncillarentzat, alegia. Mendiko bigarren saria Electromercantil taldeko Iker Perezek irabazi du, eta hirugarrena Abel Rosado txapeldunak. Taldekako saria, berriz, MMR Academyk irabazi du. 115 kiometro egin dituzte lasterketa bukatu duten ziklistek.
Goierrin jokatuko den junior mailako hurrengo lasterketa Liernin izango da, igandean, 41. Lierniko proba izango baita.