Urretxuko eta Zumarragako Txost! taldeak 'Euri-ura' diskoa argitaratu du
Diskoak zortzi abesti ditu. Hitzak Ogini Somarrek eta Gorka Erostarbek idatzi dituzte. Aurkezpen kontzertua Astigarretan egin zuten eta azaroren 12an Hendaian joko dute
Urretxuko eta Zumarragako Txost! taldeak bigarren lana argitaratu du. Disko berriak Euri-ura du izena eta zortzi kantu ditu. 2018ko Erreferak esperantza diskoan hasitako bidea jarraitu dute, baina beraien musika tresna, giro eta kolore berriekin zipriztindu dute.
Batetik, Paxkal Irigoien batu zaie. Hala, taldea bost kide izatera pasa da. Irigoienek teklatuarekin, saxofoiarekin eta ahotsekin bere ukitu berezia erantsi dio diskoari. Bestetik, Kezmanek efektuak erabili ditu, ahotsean zein tronpetan: oihartzunak, zortzidunak…
Taldeko kideek konposaketan zein kantuen itxuran «aniztasun handiko» diskoa dela esan dute. «Ahotsez soilik osaturiko kantu bat dago, ukitu asiar, arabiar zein mexikarrak topa daitezke, erritmo eta metrika bakoitiak eta aldakorrak, polirritmiak, distortsioak, zintzarriak…», azaldu dute aurkezpen testuan.
Egile-popa edo pop urduri eta ausarta bezala izendatzen duten estiloan berritasun nabarmenak sartu dituzte.
Hitzetan ere anitza da Euri-ura. Ogin?i Somarrek (Txost!-en eta Isuo ta Kezmanen kolaboratzaile ohikoa) eta Gorka Erostarbe zumarragarrak hartu dute parte. Poema alai eta zoroez gain, amodiozko kantu bat, kritika soziala, kexa, desadostasuna zein hausnarketa existentzialak jorratu dituzte.
Euri-ura Mukuru kolektiboaren 17. erreferentzia da. Ekoizpena taldeak berak egin du. «Soinuari eta edizio fisikoari garrantzi eta mimo berezia eskaini dizkiogu».
Diskoaren aurkezpen kontzertua Beasaingo Astigarreta auzoko eliz atarian egin zuten, irailaren 2an.
Iosu Isaias taldeko kidea oso gustura ageri da aurkezpen kontzertuan jasotako erantzunarekin. «Astigarretan oso gustura aritu ginen. Sekulako giroa egon zen. Astigarreta oso leku berezia da. Eliz atarian jo genuen, Astigarretan kanpoko jendea ere bizi da… Herrialde ezberdinetako lagunak eta adin ezberdinetakoak elkartu ginen. Hurrengo kontzertua Hendaian (Lapurdi) egingo dugu, azaroaren 12an».
Brinkolan grabatua
Txost! taldeak Urretxun eta Zumarragan du jatorria, baina Irigoien baxenafarra da, Isaias zarauztarra eta Kezman (Jon Murua) gabiriarra. Gainera, Brinkolan entseatzen dute eta bertako baserri batean grabatu dute diskoa.