Jendetza elkartu da Zaldibiko Ardiki Egunean. Andoni Egañak eta Sebastian Lizasok bertsoen bidez iragari zituzten mondeju eta gazta sariketetako irabazleak
Goizean goizetik mondejua izan zen jaiaren protagonista edo erdigune. Ardiki egunaren aurtengo edizioan ere artzaintzari eta Zaldibian horren ezaguna den mondejuari keinu berezia egin zieten, hauen omenezko jai bilakatuz eguna. Ardiki Eguneko Batzordearen eta Zaldibiko udalaren eskutik antolatutako jaia da eta urtero-urtero urriko azken igandean ospatzen da. Aurten ere jendetza izan zuten goiz-pasa, azoka ikusi, mondejua jan, giroaz gozatu… 27. Mondeju lehiaketa eta 24. Aralar Gazta lehiaketa ere izan zituzten.
Sekulako azoka izan zuten, plazaren gehiengoa eta Santa Fe kalearen zati bat izan ziren azokako eremuak, baita Toki Alai pilotalekuko ezker pareta ere. Denetariko produktuak ikusi ahal izan zituzten gerturatu zirenek. Egurrez eginiko zenbait produktu zeuden, hala nola, sukaldeko tresnak, egurrezko aulki bereziak, jostailu tradizionalak,… Janariak ere izan zuen bere tartea azokan. Mondejuaz eta gaztaz gain ogia, pastelak, erroskillak, eztia, arraina, fruta, taloak eta abar. Horrez gain, arropa, jostailu, bitxi zein dekorazio tresnaz bete zuten Zaldibia. Jendetza eta giro bikaina nagusitu ziren eta bertan jasotakoaren arabera, salmentak «nahiko ondo» joan ziren, batez ere janariari eta objetu tradizionalei dagokienean.
Bertso bidez
Andoni Egaña eta Sebastian Lizaso izan zituzten bertsotan goizean zehar Toki Alai pilotalekuko eszenatokian, 27. Mondeju lehiaketako eta 24. Aralar Gazta lehiaketako epaimahaiak lanak amaitu bitartean. 13:00etarako amaituta zituzten lanak eta sari banaketari hasiera eman zioten, modurik berezienean. Bertso bitartez eman zituzten irabazleen izenak, postu bakoitzeko bertso bat botaz irabazlea iragarriz. Lizasoren lana izan zen Mondeju Lehiaketako irabazleak iragartzea eta Egañarena, aldiz, Gazta Lehiaketakoak aipatzea.
Beko Karnizerie izan zen mondejugile onena eta atzetik Juan Mari Galarza eta Illati Taberna izan zituzten. Gaztagileen artean, aldiz, Joseba Insausti ordiziarra gailendu zen, beste urte batzuetan ere irabazle izan den gaztagilea. Atzetik Katxiñeko Inazio Irastorza eta Borda Berriko Iker Sukia izan zituen.
