Proiektuarekin desadostasuna adierazi dute Aldundiko Ondare eta Artxiboen Zerbitzuek, hainbat natur taldek eta talde ekologistek, Mendi Federazioak eta norbanako ugarik.
Ausa-Gazteluko gailurra, Txindoki aldera igotzeko bidetik ateratako argazkian. Ingurumen Departamenduak ez du baimenik eman Abaltziketako onura publikoko Egido mendian, Ausa Gaztelu magaletik igaroko den pista proiektua egiteko. Iragan uztailean publiko egin zuen Gipuzkoako Foru Aldundiak pista proiektu hori. Baso lanak egiteko beharrak sortuta, hori izan zen pista egiteko aldundiak emandako arrazoia. Proiektua publiko egin eta gutxira pista proiektua etetea eskatu zuten Landarlan Ingurumen elkarteak eta Eguzkik. Pista egin ordez, beste alternatiba batzuk ere proposatu zituzten. Horrez gain, gizarte osoari eskatu zioten, proiektuak inpaktu handia sortuko zuela-eta, hori galerazteko alegazioak egiteko.
Azaroaren erdialdera, Gipuzkoako Foru Aldundiko Ingurumen departamentuak argitaratu du pisten proiektuari buruzko ingurumen inpaktuaren agiria. Proiektuarekin desadostasuna adierazi dute Aldundiko Ondare eta Artxiboen Zerbitzuek, hainbat natur taldek eta talde ekologistek –Arkamuska, Eguzki, Landarlan, Mutriku Natur Taldea, Otsotarrak eta SSEO-Birdlife–, Gipuzkoako Mendi Federazioak eta norbanako ugarik.
Aurkeztutako alegazioak direla eta, pista egiteko baimenik ez du eman Ingurumen Departamenduak, eta baldintza ugari eta zorrotzak eskatu ditu. Hasteko, Egido mendiaren plangintza eta zero alternatiba, hau da, pista proiektua ez egitea aztertu beharko dela.
Horrez gain, Ingurumen Departamenduak azaldu du, Aralar osorik, EAEko Paisaia Berezi eta Apartekoen Katalogoan sartzeko proposatuta dagoela, ingurune berezia da eta oso balorazio handia du.
Landarlan Ingurumen Elkartea izan da proiektuaren aurkako alegazioak egin dituen taldeetako bat, eta azken berri hau jakin bezain pronto adierazi dute «espero dugu proiektu hau behin-betiko baztertzea, arrazoi sakonak baitaude horretarako-eta».
Momentuz behintzat, badirudi, proiektua etetea lortu dutela, eta Landarlan Ingurumen Elkarteko kideek «eskerrak» eman nahi dizkiete proiektuaren aurkako ekarpena egin duten guzti-guztiei.
