Miren Elgarresta: "Maskulinitate eredu berritzaileak behar ditugu"
Miren Elgarresta Emakundeko zuzendaria elkarrizketatu dute gaur Hamaika Telebistan 'Gurean Gaur' telebista saioan. Azaroaren 25erako martxan jarritako kanpaina izan du hizpide, eta nabarmendu du aurten gizonezkoengan jarri dutela fokua.
Miren Elgarresta Emakundeko zuzendaria elkarrizketatu dute gaur Hamaika Telebistan. Azaroaren 25erako martxan jarritako kanpaina izan du hizpide, eta nabarmendu du aurten gizonezkoengan jarri dutela fokua: “Gehiegitxo jartzen genuen fokua emakumearengan, biktimarengan, eta gizonei interpelazio zuzena egitea erabaki genuen”. Zentzu horretan, Elgarrestak azpimarratu du gizonek beste gizonak interpelatu behar dituztela.
Oraindik ere gizartean matxismoa “errotuta” dagoela dio Elgarrestak, nahiz eta azken urteetan aurrerapauso “nabarmenak” eman diren: “Emakumeen eta gizonen arteko berdintasunaren beharra agerian gelditu da, eta berdintasun politikak lehen lerrora ekartzeko momentua da”. Hori horrela, azpimarratu du instituzioek jarraitu behar dutela berdintasun politika gehiago bultzatzen eta gaia sozializatzen: “Arazo konplexua da, eta konplexutasun horretan, ekintza eta estrategia adimentsuak behar ditugu”. Horrez gain, dio indarkeria matxistari aurre egiteko ezinbestekoak direla prebentzio lana eta sentsibilizazioa.
Maskulinitate berriak eraikitzea ezinbestekotzat jo du, eta dio “deseraiki” egin behar direla orain arteko eredu “desegokiak”.
GoiBerri.eus astekariak joan den astean argitaratu zuen Miren Elgarresta zumarragarraren egindako elkarrizketa zabala.