Hizkuntza ohiturak aldatzen
Euskaraldian 161.099 lagunek eta 6.634 entitatek eman dute izena. Hizkuntza ohiturak aldatzen jarraitzeko deia egin dute. Gazte eguna ospatu dute Beasainen
Bukatu da hirugarren Euskaraldia, baina bidea ez da amaitu, Ahobizi eta Belarriprest rolekin, hizkuntza ohiturak aldatzeko ariketa sozialarekin egunero segitzeko deia egin diete parte hartu duten herritar eta entitate guztiei. «Jarrai dezagun hizkuntza ohiturak aldatzen eta euskararentzako gune erosoak sortzen». Aurtengo Euskaraldian 161.099 lagunek eta 6.634 entitatek eman dute izena. Ariketa soziala gizartean «txertatua» dagoela nabarmendu dute.
Euskaraldia «ariketa efektiboa» dela azpimarratu dute antolatzaileek: Batetik, norberaren euskararen erabilera hazi egin delako, eta, bestetik, entitateetan euskaraz «eroso» aritzeko neurriak hartu eta gune babestuak sortzen direnean ere euskaraz gehiago egiten delako.
Euskararen Eguna
Abenduaren 2an Euskaraldia amaitu eta hurrengo egunean Euskararen Nazioarteko Eguna izan zen larunbatean. Era desberdinetako ospakizunak egin zituzten Goierrin. Beasainen esate baterako, lehen aldiz, Aittu gazte eguna ospatu zuten herriko gazteek. Trikipoteoa, bertso bazkaria, txaranga eta erromeria izan zituzten Gernika pasealekuko pilotaleku txikian.
Bestalde, Euskaraldiaren barruan egin duten Hikaldiarekin amaitzeko, sari banaketa ekitaldia egingo dute egunotan, Kattalin erretegian.
Bestalde, Uemako udalerriek Arnasa eta bidea zabaltzen adierazpen bateratua argitaratu zuten. «Uemara gehitu diren azken udalak kontuan hartuta, 300.000 biztanleko lurgune euskalduna osatzen» dutela nabarmendu dute. «Ez da nolanahiko zenbakia. Euskal Herrian ekoizten den euskararen erdia udalerri euskaldunetan ekoizten baita».
Beraz, udalerri euskaldunetan «euskarari eusteko egiturazko erabaki ausartak» eskatu dituzte, «elebitasun orekatua gainditu eta oraindik ere hauskorrak diren udalerri euskaldunetan euskarak bidea eta arnasa zabaltzen segi dezan».