Kattalin erretegiaren Eguberrietako menu proposamena
Beasaingo Kattalin erretegiko Arantxa Agirrezabalak honako menu proposamena egin du datozen Eguberrietarako: Onddoak plantxan, Txangurro betea labean eta Pantxineta. Errezetak albiste barruan.
ONDDOAK PLANTXAN, TIPULA KARAMELIZATU ETA ARRAUTZA GORRINGOAREKIN
Onddoak plantxan. Argazkia: Mikel Albisu
Osagaiak (Bi lagunentzat)
- Kilo bat onddo
- Kilo bat tipula
- Azukrea edo eztia
- Edalontzi txiki bete Jerez edo sagardo ozpin
- Bi arrautza
- Gatz lore ezkatak
Onddoak
Onddoen txapelak eta hankak bereizi eta ondo garbitu. Xafla lodi xamarretan ebaki eta aurretik olio pixka batekin bustitako plantxa beroan jarri. Gutxi gora behera minutu batez egin alde bakoitzetik.
Tipula karamelizatua
Tipulak juliana finean ebaki eta su eztian gorritzen jarri olio pixka batekin. Gorritzen ari direnean ozpina eta azukrea –edo eztia norberaren arabera– gehitu. Poliki-poliki nahasten joan ondo loditu arte.
Aurkezpena
Onddoak borobilean jarri plateraren inguruan. Erdian tipula karamelizatua jarri eta honen gainean arrautza gorringoa. Gatz lore
Txangorru betea labean. Argazkia: Mikel Albisu
TXANGURRO BETEA LABEAN
Osagaiak (Bi lagunentzat)
- Bi txangurro
- Tipula bat
- Baratxuri ale bat
- Porru bat
- Bi tomate heldu
- Gatza
- Oliba olioa
- Kopa erdi koñak
- Ogi birrindua
- Gurina
Txangurroa
Eltze bat sutan jarri ur hotza, gatza eta txangurroekin. Irekitan hasten denean 15 bat minutuz egosten utzi. Atera eta hoztu ondoren barruan duten haragi guztia atera.
Betegarria
Tipula, baratxuria eta porrua ondo txikitu eta olio pixka batekin erregosi. Tomateak zuritu eta xehatu. Barazkiak gorritzen hasten direnean tomatea, koñaka eta gatz pixka bat gehitu. Koñakaren alkohola erretzeko flanbeatu eta 15 bat minutuz su eztian loditzen utzi. Ondoren txangurroen haragia gehitu eta minutu pare batez irakiten utzi.
Txangurroen oskolak prestatu dugun orearekin bete. Gainean gurin pixka batekin koipetu, ogi birrinduarekin hautseztatu eta labean 5 bat minutuz gratinatu.
Aurkezpena
Txangurro oskol beteak plater batean jarri perrexil adartxo batekin.
Pantxineta zati bat. Argazkia: Mikel Albisu
PANTXINETA
Osagaiak
Hostorea egiteko
- Almendra gorrituak
- Glass azukrea
- Arrautza bat
Pastel-krema
- 750 zentilitro esne
- Limoi eta laranja azalak
- Kanela adartxo bat
- 150 gramo azukre
- 80 gramo arto-irin
- 3 arrautza
Pastel-krema
Esne pixka bat gorde eta gainontzekoa berotu laranja eta limoi azalekin eta kanelarekin. Bitartean ontzi batean azukrea eta irina ondo nahastu. Beste ontzi batean arrautzak irabiatu eta aurreko nahasketari gehitu, aurrez gorde dugun esnearekin batera. Ondo irabiatu pinportak desegin arte.
Esnetan ditugun zitriko azalak kendu eta aurreko nahasketa gehitu, su eztian eta nahastetik utzi gabe. Loditzen denean hozten utzi.
Hostorea
Hostorezko zirkulu bat labeko azpilean jarri eta pintzel baten laguntzaz irabiatutako arrautzarekin busti ertz guztia. Erdian pastel-krema gehitu eta beste hostore zirkulu batekin estali. Ertz guztia zanpatu ondo itxi arte. Gaina arrautza irabiatuarekin busti eta txikitutako almendrekin eta glass azukrearekin hautseztatu. 160 gradutara berotutako labean sartu 45 minutuz.
Aurkezpena
Epeltzen utzi, zatia ebaki glass azukrearekin hautseztatu eta txokolatearekin apaindu.
