Urkiko jaiak ospatuko dituzte bihar eta asteburuan
Gurutze Deunaren Eguna izango da bihar. Larunbatean botako dute suziria. Asteburuko afarira edo bazkarira joan nahi dutenek izena eman behar dute ostirala baino lehen.
Bihar eta asteburuan, Urkiko Gurutze Deunaren jaiak ospatuko dituzte auzotarrek. Bihar hasiko dira ospakizunak, Gurutze Deunaren egunez. 11:00etan meza nagusia izango da, eta ondoren hasiko da jai giroa. Hamaiketakoa egingo dute Ostolaza eta Pujana trikitilariekin, 14:30ean bazkaria, eta 19:00etan, erromeriak jarraituko du trikitilariekin.
Bi eguneko etenaren ostean, larunbatean 20:00etan jaurtiko dute jaietako suziria. 21:00etan lagun arteko afaria egingo dute, eta 23:00etan, erromeria, Olarte eta Larrañaga trikitilariekin. Igandea izango da jaietako azken eguna. 11:00etako meza nagusiaren ondoren, hamaiketakoa egingo dute Laja II eta Lutxurdio trikitilariekin, eta 14:30ean bazkaria. 18:30ean 38. Toka Txapelketa jokatuko da. Jaiei amaiera emateko, erromeria izango da Laja II eta Lutxurdiorekin.
Jai guztietan zehar, antxuma bat zozkatuko dute. Zenbaki irabazlea igandean 20:00etan aterako da. Larunbateko afarira edo igandeko bazkarira joan nahi dutenek izena eman behar dute ostirala baino lehen, 679 780 754 zenbakira deituta.
