Urolaren lore eskaintza eta txapelketa
Aspaldiko ohiturari jarraituz, denboraldia hasi aurretik, Urola Kirol Elkarteak Antioko Amari bisita egingo dio. Horretaz gain, aurreko urteetan bezala, lagunarteko futbol txapelketa jokatuko da. Bai bisita eta bai txapelketa larunbat honetan izango dira.
Bisitari dagokionez, 13:30ean izango da. Klubeko kideek loreak, taldeko elastikoa eta baloi bat eskainiko dizkiote Ama Birjinari. Ekitaldi horretan emakumezkoen eta gizonezkoen lehen taldeetako jokalariek, entrenatzaileek eta zuzendaritzako kideek parte hartuko dute. Baita Zumarragako Udaleko ordezkariek ere.
Horretaz gain, Zumarraga-Urretxu Txapelketa jokatuko da Argixao futbol zelaian. Goizean emakumezkoen txapelketa jokatuko da eta arratsaldean gizonezkoena. Emakumezkoena 10:00etan hasiko da. Hiru taldek parte hartuko dute: Urolak, Elgoibarrek eta Deba eta Mutrikuko Ondarbeltzek.
Gizonezkoen txapelketa, berriz, 17:00etan hasiko da. Hor ere hiru taldek parte hartuko dute: Urolak, Ilintxak eta Durangoko Kulturalak.
