Tobera musika eskolak 37. ikasturtea hasiko du
Tobera musika eskolako ikasleak San Bartolome egunean, Zegaman. TOBERA Datorren irailaren 6an hasiko du Tobera musika eskolak 37. ikasturtea. Bezperan, irailaren 5ean, musika instrumentuetako ikasleen artean ikasturte berrirako ordutegiak banatuko dituzte. Egun horretan, musika instrumentuetan izena eman duten ikasleak aurrez aurre elkartu beharko dute irakasleekin “elkarrekin asteko ordutegiak zehazteko”. Horretarako, irailaren 5ean, 17:30ean Zegamako Jabier Otaegi kultur etxera eta 19:00etan, Segurako musika eskolaren egoitzara joan beharko dute ikasleek.
Bestalde, berritasunak ere izango dira hastear dagoen 37. ikasturte honetan, Iker Gomez de Segura Toberako zuzendariak adierazi duenez. Alde batetik, organoa ikasteko aukera izango da ikasturte berrian. “Lehenengo aldia da Toberak horretarako aukera eskaintzen duela, eta oso musika eskola gutxi dira eskaintzan organoa barneratuta dutenak”, adierazi du zuzendariak. Horretarako, Tobera musika eskolak hitzarmena egin du Zegamako eta Segurako parrokiekin.
Gainera, 16 urtetik gorakoen euskal dantzetako taldea ere osatu nahi dute. Entseguak astearteetan izango dira, 18:00etatik 19:30era Zegaman. Organo klaseetan edo euskal dantza taldean izena eman nahi dutenek, mezu bat idatzi dezakete tobera@tobera.org helbide elektronikora.
Leku aldaketa Seguran
Ikasturte berriari begira aldaketa garrantzitsu bat emango da Seguran. Aurtengo kurtsoan Laiotz herri eskolan emango dituzte klaseak, izan ere, orain arte musika eskola izan den egoitzara udaletxeko bulegoak lekualdatuko dituzte udaletxean egin behar dituzten berrikuntza lanak direla eta.
Ikasturte berrirako kuotak ere zehaztu dituzte dagoeneko:
- Eskola kolektiboak: 20,2€.
- Bakarkako eskolak (musika tresna): 38,5€.
- Musika taldeak: 7,3€ ikasleek eta 16,6€ ikasle ez direnek.
Abuztuan, festarik festa
Tobera musika eskolak oraindik ikasturtea hasi ez duen arren, bertako ikasleak hainbat plazatan aritu dira abuztuan zehar. Hala, eskolako txistu, euskal dantza eta trikiti eta pandero ikasleek Zeraingo Andra Mari eta Zegamako San Bartolome jaietan parte hartu dute. Argazkian, Toberako ikasleak San Bartolome egunean Zegaman.
