Baztarrika Gazta Gipuzkoako Artzai Gazta Txapelketako irabazlea
Legazpiko Artzai egunean Gipuzkoako Artzai Gazta txapelketaren 39.edizioa izan dute eta Baztarrikak irabazi ditu dastaketa herrikoiaren saria eta Gipuzkoako gaztarik onenarena.
Artzai Eguna ospatu dute gaurkoan legazpiarrek eta ohi bezala, bertan egin dute Gipuzkoako Artzai Gazta txapelketa. Aurtengo 39.edizioa izan da eta datorren urtean edizio borobila izango dute, 40.edizioa. Lehiaketarekin hasi aurretik, omenalditxo bat egiteko tartea hartu dute. Gaurkoan Erraizabal baserriko Juan Jose Aranguren eta Arantxa Segurola omendu dituzte, Joxe Mari eta Benjamin Altxu Almandozekin batera. Hauek guztiek artzaintzan izandako ibilbidea errepasatu dute omenaldian eta aitortza egin zaio artzaintzan egindako ekarpenagatik. Erraizabal baserrikoak bertan jardun zuten artzaintzan eta Joxe Mari eta Benjami Altxu Almandoz ameriketan ibili ziren. Hala ere, laurei eskertu nahi izan die artzaintzaren munduak egindako lana eta izandako dedikazioa.
Ondoren, lehiaketako sari banaketa hasi da eta aurtengoan Baztarrika izan da herritarren zein epaimahaiaren ustetan gaztarik onena, eta hau hala izanik, Gabiriako gaztagileak izan dira etxera sari pare bat eta txapela eraman dituztenak. Gainera, belaunaldi berriak izan dira oholtzara igo direnak saria jasotzera eta une «hunkigarria» izan da. Horrez gain, bigarren eta hirugarren sariak ere Goierrin bertan geratu dira, izan ere, Olaberriko Aizpea Gaztandegia izan da bigarren sailkatua eta hirugarrena, berriz, Segurako Ondarre.
Epaimahaiak 3 orduko lana egin ondoren erabaki du irabazlea eta 6.postutik hasi eta lehenengora arte joan dira oholtzatik pasatzen, bakoitza bere sariaz harro eta gustora, izan ere, aipatu dutenaren arabera, txapelketa hau «ez da erraza izaten» haientzat eta «ohorea» da sariak eskuratzea halako lehiaketetan. Gaztetxoen epaimahaiak ere hartu du bere erabakia aurten eta haien ustez, Gipuzkoako gaztarik onena Zeraingo Basazabal gazta da.
Honela geratu da aurtengo sailkapena:
- Baztarrika (Gabiria)
- Aizpea (Olaberria)
- Ondarre (Segura)
- Mausitxa (Elgoibar)
- Otatza (Ordizia)
- Gesaltza (Oñati)
