Idiazabalgo 43. Herri Krosean izena emateko epea zabalik
Urtarrilaren 28an jokatuko da Idiazabalgo korrika proba beteranoa. Urtarrilaren 12ra arte zortzi euro balio du izen-emateak, hortik aurrera hamar.
Idiazabalgo 42. Herri Krosaren irudi bat. // Argazkia: Maider Insausti Idiazabalgo 43. Herri Krosean izena emateko epea zabalik dago dagoeneko. Kronoak.com plataformaren bidez eman behar da izena. Urtarrilaren 12ra bitarte apuntatzen direnek zortzi euro ordaindu behar dituzte, eta hortik aurrerakoek hamar. Partaide guztiek Idiazabal Gazta zati bat jasoko dute opari.
Helduen eta beteranoen proba nagusia 12:00etan hasiko da. Emakumezko nahiz gizonezko, 10.245 metroko ibilbidea osatu beharko dute. Ordu bereak kadeteak ere aterako dira (2008-2009an jaioak), eta horiek 3.525 metroko ibilaldia egin beharko dute korrika.
Aurretik, 10:45ean, haurren txanda izango da. Infantilek (2010-2011) 1.600 metroko proba dute, alebinek (2012-2013) 1.100 metrokoa eta benjaminek (2014-2015) 600 metrokoa. Haur guztiei domina emango diete.
