Santa Barbara ermita berrituaren estreinaldia
Santa Barbara ermita berrituta, iraileko sutearen ondoren.Joseba Telleria Sanson mendi lasterketarekin batera, badute bestelako planik Seguran asteburu honetan. Santa Barbara ermitara irteera antolatu dute hainbat herritarrek goizean. 08:30ean irtengo dira Seguratik, gero 10:30ean ermitan meza ospatzeko. Ohitura denez, Kortaberri auzokoek kafea eta pattarra eskainiko dizkiete Santa Barbarara iritsi berriei.
Tradizioak dioen bezala, bertako pago adarrez baliatuta inguruko lurrak bedeinkatuko dituzte lau haizetara. Meza ondorenean, hamaiketakoa izango da bertaratutakoentzat udalaren eskutik.
Ermitaren inaugurazioa
Pasa den irailaren 1ean sutea gertatu zen Santa Barbarako ermitan. Suak eraikinaren alde bat guztiz erre zuen —aterpetxe funtzioa betetzen zuena—, baina ermita bera salbatzea lortu zen suhiltzaileen erantzunari esker.
Berrikuntza lanak eginda, erabat konponduta dago ermita. Biharko ekimena, berritutako zatia inauguratzeko ere baliatuko dute. Arratsaldean, Sanson mendi lasterketaren testigu ere izango da, ibilbideak bertatik igaroko baitira.
