Ataun, Beasain eta Zaldibia, Herriarteko finalerdietara sailkatze bidean
Hiru herriak 2 eta 1 jarri dira aurretik final laurdenetako joaneko partidetan. Itzuliko partidak datorren asteburuan jokatuko dituzte. Sailkatuz gero, finalerdietako lau herrietatik hiru Goierrikoak izango dira.
Zaldibiaren eta Altzoren arteko kadeteetako partida, Resti pilotalekuan.Iñaki Gurrutxaga Goierriko pilotaren harrobia emaitzak ematen ari da. Ataunek, Beasainek eta Zaldibiak final laurdenetako joaneko partidak jokatu zituzten joan den asteburuan, eta hiru herriek hiru partidetatik bi irabaztea lortu zuten. Final laurdenetako laugarren kanporaketa Hernaniren eta Oiartzunen artekoa da, eta oraingoz bigarrena jarri dira aurretik (1-2).
Sailkatuz gero, Ataunek eta Zaldibiak elkarren aurka jokatu beharko lukete finalerdietan, eta Beasainek Hernaniren edo Oiartzunen aurka.
Ataunen Herriarteko aurtengo pilotari taldea.Hitza
Ataun, 1 eta 2 aurretik Bergaran
Ataunek, multzo buruetako bat izanik, joan den asteburuan ekin zion 2024ko Gipuzkoako Herriarteko Pilota Txapelketari Bergarako udal pilotalekuan. Ataundarrak jarri dira aurretik kanporaketan (1-2), baina tanteoa aurka du (48 tanto Ataunek, 49 Bergarak). Itzuliko partidak Ataungo Auzoetan jokatuko dituzte, ekainaren 7an, 19:00etan hasita.
Emaitzak
Kadeteak: Etxeberria-Etxabe 22-4 Dorronsoro-Alzua
Jubenilak: Alberdi-Ormaetxe 6-22 Contreras-Kerejeta
Afizionatuak: Otermin-Martin 21-22 Erauskin-Kerejeta
Beasaingo taldea osatzen duten pilotariak.Ariane Vierbücher
Beasain, Azpeitiari aurre hartuta Antzizarren (2-1)
Beasain final hamaseirenetan sartu zen aurtengo Herriartekoan, aurreneko kanporaketan. Tolosa kanporatu zuen orduan, eta final zortzirenetan Zestoa utzi zuen kanpoan. Final laurdenetako joanekoa Antzizarren jokatu dute asteburuan Azpeitiaren aurka, eta 2 eta 1 jarri dira aurretik. Tanteoa ere alde du (47 tanto Beasainek, 46 Azpeitiak). Itzuliko partidak Azpeitian jokatuko dituzte ekainaren 7an Izarraitz pilotalekuan (22:00).
Emaitzak
Kadeteak: Goikoetxea-Goikoetxea 3-22 Artetxe-Artsuaga
Jubenilak: Madina-Ariztimuño 22-20 Sarasua-Otaegi
Afizionatuak: Azketa-Garmendia 22-4 Labaka-Egiguren
Zaldibiak Herriartekorako atera duen pilotari taldea.Gaztelupe pilota kluba
Zaldibiak Andoaini hartu dio aurre Restin (2-1)
Beasain bezalaxe, final hamaseirenetan hasi du Herriarteko lehia Zaldibiak, eta Idiazabal eta Altzo kanporatu ondoren iritsi da final laurdenetara. Joaneko kanporaketan 2 eta 1 hartu dio aurre Zaldibiak Andoaini Resti pilotalekuan, eta tanteoan ere alde polita dauka (61 tanto Zaldibiak, 46 Andoainek). Itzuliko partidak Andoaingo Arrate pilotalekuan jokatuko dituzte, 19:30ean hasita.
Emaitzak
Kadeteak: Mantzisidor-Lopez 17-22 Beroz-Gaztañaga
Jubenilak: Aranburu-Mendizabal 22-9 Uria-Salbador
Afizionatuak: Sukia-Elizegi 22-15 Urruzola-Beloki
