Bizipozaren jaialdian Ataungo kultur eragileei aitortza
Bizipozaren jaialdian Ataungo kultur eragile desberdinei aitortza egin diete, Otsoak Dantza Taldeak eta Porrotxek gidatutako ekitaldian.
Gaur goizeko 11:00etan ataundarrak San Gregorioko Zelai pilotalekuan bildu dira, musika eta dantza artean herriko kultur eragile desberdinei aitortza egiteko eta hauen lana balioan jartzeko. Horretarako, Otsoak Dantza Taldeak eta Porrotx pailazoak gidatutako ekitaldia egin dute.
Otsoak Dantza Taldeko adin desberdinetako haur, gazte zein helduak izan dira ekitaldia girotzen eta kultur eragile bakoitzari aitortza egin aurretik dantza bat eskaini dute. Ondoren, Porrotxek kultur eragileak oholtzara deitzen zituen, banan-banan eta hauei haien lanaren aitortza moduko bat egiten zioten, koloretako zapiak erabiliz, bakoitza sinbolismo handiz beteta. Hainbat eta hainbat izan dira omenduak izan diren kultur eragileak gaurkoan, hala nola, Ataun irratia, kantujira taldea… esker hitzak izan dituzte guztiek eta herritarren babesa eta goxotasuna jaso dute ekitaldi osoan zehar.
Aitortza hori jaso ondoren, horma batean osatzen zihoazten puzlearen pieza bat jarri dute kultur eragile guztiek, elkarren artean, Ataungo kultur esparrua osatzen dutela irudikatuz.
