Toberako ikasleen ikasturte amaierako jaialdiak bihar eta etzi
Zegaman egingo dute lehenengo saioa bihar arratsaldean, eta etzi, Seguran bigarrena. Idiazabalgo jaialdia ekainaren 26an izango da.
Tobera musika eskolako ikasleek musika jaialdiak antolatu dituzte ikasturtean zehar ikasitakoa erakusteko helburuarekin. Aurtengo jaialdiak bihar eta etzi eskainiko dituzte, Zegaman eta Seguran, hurrenez hurren, 18:30ean hasita. Euria eginez gero, Zegamako patio estalian eta Segurako Botikaxaharrean izango dira. «Kalejirak, kontzertua, maila gainditu duten ikasleen artean diploma banaketa, afari merienda eta beste osagai asko» egongo direla ziurtatu dute antolatzaileek. Zegama eta Segura artean doako autobus zerbitzua ere izango dute ikasleek egun hauetan, ohiko moduan. Amaitzeko, Idiazabalgo ikasleen kontzertua ekainaren 26an izango da, 18:00etatik aurrera Igarondo pilotalekuan.
Bai Zegaman, nola Seguran egitura berbera eman diete jaialdiei, nahiz eta edukia aldetik ezberdinak izango diren bi emankizunak. Trikitilariek emango diete hasiera jaialdiei. 18:20ean botika paretik plazara kalejiran abiatuko dira Zegaman, gaur eta Santikutz ermitatik Erreboteko karpara Seguran bihar. Behin kalejirak amaituta 18:30ean hasiko dira kontzertuak. Anitzak izango dira saioak, bai musika estiloari zein instrumentuen erakustaldiei dagokionean. Mari dantza taldeak eta Zegamako txistu taldeak parte hartuko dute gaur, Zegaman. Gainontzean, musika hizkuntzako perkusio ikasleen saioak, bakarkako piano erakustaldiak eta taldeen ikuskariak ere izango dira, musika doinu klasikoenetatik hasita modernoagoetaraino.
Doako autobus zerbitzua
Urteroko moduan, bi herrian arteko doako autobus zerbitzua izango da Toberako ikasleentzat. Bihar, Zegamako joateko Segurako geltokian hartu ahal izango dute autobusa 17:20an. Itzulera 20:40an izango da. Eta etzi, Segurara joan nahi duten ikasleek 17:10ean dute joaneko autobusa Zegamako geralekuan, eta 20:20ean itzulerakoa.
Kontzertu sortarekin amaitzeko, Idiazabalen izango da azkeneko saioa ekainaren 26an, 18:00etan Igarondo pilotalekuan.
