Alaitasuna errondailak festa handi batekin ospatuko ditu 60 urteak larunbatean
Meza, poteo musikatua, taldeko argazkia eta bazkaria egingo dituzte. Festa eguna Iruñeko Sacalfi taldearen emanaldiak itxiko du, arratsaldean.
Oporrak hartu aurretik, Zumarragako Santa Isabel jaietan jo zuen Alaitasuna errondailak, kalerik kaleTere Madinabeitia Alaitasuna errondailak 60 urte betetzen ditu aurten, eta ospakizunetan dago murgilduta. Larunbatean izango da ekitaldi nagusia, egun osoa hartuko duen festarekin.
Errondailako lehendakari Santi Usabiagak azaldu du, larunbateko festa 12:30ean hasiko dela, parrokian egingo den mezarekin. Errondailako kideek eguneko lehen abestiak eskainiko dituzte bertan, hildako kideak gogoratzearekin bat.
Meza amaitutakoan, eta 13:45ean Urbeltz pilotalekuan aterako duten argazkia egin aurretik, «poteo musikatua egingo dugu, Kale Nagusian eta Nafarroa kalean zehar, baina ez oso luzea, argazkirako puntuan iristeko».
Argazkia atera ondoren, hurrengo hitzordua Azokan izango da, bazkariarekin. «Komeni da guztiak 14:15erako mahaietan egotea, 14:30ean bazkaltzen hasteko», eskatu du. Bazkarian 200 pertsona inguru elkartuko dira, «gaurko kide guztiak, lehengo batzuk, tartean hasiera-hasierako taldeko batzuk, lagunak, zaleak, musikarien familiakoak, herriko agintariak eta gonbidatuak elkartuta». Guztientzako «oparitxo bat» izango dela aurreratu du. Bazkalondoan izango da musikarako tartea ere.
Eguna amaitzeko, kontzertua egingo du plazan Sacalfi Iruñeko musika taldeak. «Gure lagun handiak dira, eta giro ederra jartzen dute jotzen duten leku guztietan. Legazpin nahiko ezagunak dira».
Errondailan hasieratik jotzen duen Julian Armendarizek azpimarratu duenez, «urtemuga hau oso garrantzitsua da taldekideentzat, eta legazpiar guztiekin konpartitu nahi dugu ospakizuna». Gainera, Ameriketaraino iritsiko da, Latinoamerikako Errondaila Elkarteko kideak direlako.
Kontzertu gehiago
Aurrerago ekitaldi gehiago ere izango dira: hilaren 28an Castro Urdialeseko (Kantabria, Espainia) Alsejo errondailaren emanaldia izango da, urriaren 26an topaketa egingo dute Altsasuko Trasteando eta Ordiziako Laguntasuna errondailekin, eta azaroaren 2rako, Kanariar Irletako (Espainia) Los Paperos taldea gonbidatu dute.
