Beneditarren artxibora bisitak, herrikako hitzarmenei esker
Lazkaoko dokumentazio guneko funtsei balioa eman eta ezagutarazi nahi dituzte. Lehen bisita ostiralean da, idiazabaldarrentzat. 9 udalerrik sinatu dute.
Beneditarren fundazioko artxiboa erakusten, iaz, talde bati.Gotzon Aranburu Lazkaoko Beneditarren Fundazioak aspalditik eskaintzen ditu artxibo historikoa eta ikertzaileentzako instalazioak ikusteko bisita gidatuak. Orain, Goierriko hainbat udalekin egin dituzten hitzarmenei esker, herri bakoitzeko herritarrek izango dute bisita bereiziak egiteko aukera, aste honetatik hasita.
Hitzarmenen edukien artean, artxiboaren edukia eta balioa gizarteratzeari eman diote garrantzia, dokumentazio guneko arduradunek azaldu dutenez. «Helburua da gure zentroan gordetzen dugun ondare dokumentala balioan jartzea eta ondare hori goierritarrei ezagutzera ematea».
Hala, Beneditarren Fundazioak lankidetza itunak sinatu ditu dagoeneko Ataun, Beasain, Idiazabal, Legorreta, Mutiloa, Olaberria, Segura, Zaldibia eta Zegamako udalekin. Udalerri horietako herritarrekin bisita gidatuak antolatu dituzte.
Bisitak herrika
Bi modutako bisitak izango dira. Batetik, bisita irekiak jarriko dituzte, herri horietako edozein herritarrek joan ahalko dutenak. Beste bisita batzuk espezifikoagoak izango dira, elkarte edo talde jakinekin garatuko direnak, beti ere hitzarmena egin duten herrietakoak.
Bisita guztiak iluntzeetan izango da, 18:30etik 20:00etara. Beneditarren artxiboko eta dokumentazio guneko funtsak erakutsiko dizkiete bertako arduradunek.
Plaza mugatuak direnez, izena eman behar da artxiboan (943 88 87 81; lbf@lbf.eus). Herri bakoitzari bina egun izendatu dizkiote.
Aurreneko bisita ostiral honetan, irailak 22, egingo dute, Idiazabalgo bizilagunentzat.
Egutegia
Lazkaoko Beneditarren Fundazioko artxibora bisita gidatuak herritarrentzat.
- Ataun: Irailak 26 eta azaroak 28.
- Beasain: Azaroak 21 eta 29.
- Idiazabal: Irailak 20 eta urriak 17.
- Legorreta: Urriak 10 eta azaroak 22.
- Mutiloa: Urriak 24 eta azaroak 8.
- Olaberria: Urriak 25 eta azaroak 14.
- Segura: Irailak 27 eta azaroak 7.
- Zaldibia: Urriak 31 eta azaroak 15.
- Zegama: Urriak 3 eta 11.
Izena emateko: 943 88 87 81 edo lbf@lbf.eus
