EGITARAUA. Ospa dezagun elkarrekin HITZAren 20. urteurrena
Erraldoiak eta buruhandiak, eta dultzaina-jotzaileak izango dira goiz-eguerdian. Arratsaldean, Bakuntza taldearen saioa eta zazpi herriren arteko herri kirol lehia izango da. Gauean, afaria. Festa Lazkaon da.
GOIERRIKO HITZAren bosgarren urteurreneko festa Lazkaon, 2009an.Arkaitz Apalategi Hogei urte ez direlako egunero betetzen, ospa dezagun elkarrekin. Zatoz GOIERRIKO HITZAk larunbatean Lazkaon antolatu duen festara. Gonbidatuta zaudete Hitzakide guztiak, iragarle denak, kolaboratzaileak, komunitateko kideak, irakurleak…
Egun osoko egitaraua antolatu dugu horretarako, goizetik iluntzera arte. Goiz-eguerdi partean, erraldoiak eta buruhandiak izango dira, dultzaineroen musikarekin. Arratsaldean Beasaingo Bakuntza taldeak alaituko du kaleko giroa, eta herri kirolen txanda izango da ondoren. Eskualdeko zazpi herriren arteko lehia ikusi ahal izango da. Trikitilarien doinuek poteoa alaituko dute, eta eguna amaitzeko, afaria izango da Lazkaoko plazako frontoian. Herritar eta eragile guztiak gonbidatu nahi ditugu bertara.
GOIERRIKO HITZAren urteurreneko materiala erosteko eta harpidetza egiteko aukera izango duzue bertaratzen zaretenok. Informazio eta salmenta postu bat egongo da arratsaldean.
Tiketak salgai
Afarirako tiketak salgai daude Ordiziako Mujika liburu dendan, Lazkaoko Gerriko liburu dendan eta Urretxuko Kotoi paper dendan. GOIERRIKO HITZA-ren Beasaingo erredakzioan ere eros daitezke, Oriamendi kaleko 32. zenbakian.
Pikatzeko mokadutxoa aurrena, patatak errioxar erara lehen platera, karrillerak saltsan bigarrena eta Iztuetak eskainitako postrea izango da menua, 25 euroan. Ura, sagardoa, ardoa eta kafea ere sartzen dira. Zatoz larunbatean Lazkaora GOIERRIKO HITZAren 20. urteurrena ospatzera!
