ELKARRIZKETA. «HITZA bi eratara gustatzen zaidan arren, digitalki nahi dudanean irakurtzeko aukera ematen dit»
Hitzakide digitala da idiazabaldarra. Paperekorik ez du hartzen etxean, baina hala ere 50 euroko ekarpena egiten dio urtean GOIERRIKO HITZAri webgunean irakurtzen dituen albisteen truke.
Lurdes Intxausti Idiazabalgo Hitzakidea. Noiztik zara Hitzakide? Eta zergatik?
Hasieratik naiz Hitzakide. Inguruko informazioa eskuratzeko baliabide bikaina dela iruditzen zait eta nire inguruan egunero zer gertatzen den jakitea gustatzen zait.
Zein atal gustatzen zaizu gehien irakurtzea?
Dena irakurtzen dut, ez daukat atal gustukoenik. Oso erraz irakurtzen den egunkari bat da eta denari errepasotxoa ematea gustatzen zait.
Nola irakurtzen gaituzu? Paperean, digitalki…
Lehen paperean irakurtzen zintuztedan, baina orain digitalean. Bi eratara gustatzen zaidan arren, digitalki nahi dudanean irakurtzeko aukera ematen dit, goizean goiz jaiki eta banatzaileak egunkaria noiz ekarriko zain egon beharrik gabe.
Noiz irakurtzeko ohitura duzu GOIERRIKO HITZA?
Egunero, goizean gosariarekin batera irakurtzea gustatzen zait. Nire eguneko plazer txiki bat da momentu hori.
Zerk desberdintzen gaitu beste egunkari batzuetatik?
Oso gertukoa egiten zait niri GOIERRIKO HITZA. Normalean planak eskualdean egiten ditudanez, inguruko berrien informazioa jasotzea gustatzen zait. Gainera albisteak oso erraz irakurtzen dira.
«Aurrera jarraitzeko laguntza eskaintzeaz gain, eskualdeko euskara bultzatzeko ere balio du harpide egiteak»
Hitzakide ez den irakurle bati zer esango zenioke?
Esango nioke, lehenik eta behin, paperean irakurtzeko egunkaria. Horrela bertsio tradizionalean ea gustatzen zaion ikusiko lukeela. Zer den ikusi eta gustatuz gero, bi bertsio dituela esango nioke: paperean edo digitalean. Nire kasuan bi eratara probatu dut eta uneoro egokien datorkidan aukera aukeratu dut. Horrez gain, inguruko prentsa denez, esango nioke merezi duela harpidedun egitea. Aurrera jarraitzeko laguntza eskaintzeaz gain, eskualdeko euskara bultzatzeko ere balio duelako.
Zure inguruan ohikoa al da HITZA irakurtzea?
Bai, oso ohikoa da. Ni bizi naizen inguruan, hala ere, paperezkoa irakurtzen da gehien.
Zozketetan parte hartzen al duzu?
Zozketetan parte hartzen dut eta tokatu ere bai. Oso sari onak jartzen dituzue eta azkenean jendea erakartzeko gantxo txiki bat dira.
Goiberri irakurtzen duzu?
Goiberri aldizkariaren harpidetza ez daukat, baina nire ingurukoei eskatzen diet tarteka eta asko gustatzen zait irakurtzea.
