Nerea Elustondo legazpiarra Gipuzkoako Bertsolari Txapelketako finalaurrekoetara
Nerea Elustondo legazpiarra Gipuzkoako Bertsolari Txapelketako finalaurrekoetara sailkatu da gaur jokatutako final-laurdenean, Tolosan, lehen postua lortuta.
Gipuzkoako Bertsolari Txapelketak aurrera dirau eta gero eta gutxiago geratzen da final handirako. Gaurkoan amaiera eman die final-laurdenen faseari, azken saioa Tolosan eginda, Leidor aretoan. Bertan, Nerea Elustondo Plazaola legazpiarrak hartu du parte eta ondorengo bertsolariak izan ditu aurrean: Maider Arregi, Andoni Rekondo, Iñigo Mantzizidor, Jon Gurrutxaga eta Aitor Tatiegi.
Legazpiarrak hasierako agurraren ondoren 8ko nagusian ekin dio saioari, autobus gidarien azalean jarriz, Tatiegirekin batera. Ondoren, Mantzizidorrekin aritu da 10eko txikian, Behobian parte hartu behar duen korrikalari baten eta fisioterapeuta baten arteko elkarrizketa lasterketarako astebete faltan irudikatuz. Jarraian, puntuei erantzunez aritu da eta bertan, errealitatearen eta kondairen arteko mugaz, Mari jainkosari legazpiarrak berak egingo lizkiokeen eskaerez eta futbolarien mitifikazioaz aritu da. Saioak aurrera egin ahala, 8ko txikian egin du kantuan, Gurrutxagarekin. Elustondo basozainaren paperean jarri da eta Gurrutxaga perretxikozalearenean.
Puntuazio taula
| 8H | 10t | pun-eran | 8t | ganbara | Guztira | |
|---|---|---|---|---|---|---|
| Nerea Elustondo Plazaola | 94.50 | 103.00 | 105.50 | 98.00 | 99.00 | 500.00 |
| Maider Arregi Markuleta | 96.00 | 99.50 | 98.00 | 95.50 | 105.50 | 494.50 |
| Andoni Rekondo Izagirre | 94.00 | 90.00 | 107.00 | 98.50 | 90.00 | 479.50 |
| Iñigo Mantzizidor Larrañaga | 89.50 | 92.00 | 93.50 | 95.00 | 103.50 | 473.50 |
| Jon Gurrutxaga Urbieta | 91.50 | 93.00 | 86.50 | 99.50 | 89.50 | 460.00 |
| Aitor Tatiegi Loidi | 97.50 | 79.50 | 84.50 | 94.00 | 91.00 | 446.50 |
