Pala eta eskuz binakako txapelketetan izena emateko epea zabalik
Urtarrilaren 2ra arte eman daiteke izena. Arrano Kulturak antolatu du ekimena.
Artxiboko irudia.Maider Insausti Iazko arrakastaren ondoren, Emakumezkoen II. Pala Txapelketa Herrikoia antolatu du 2025erako Arrano Kulturak. Emakumezkoen artean kirola sustatzea da helburua. Zehazkiago, pilotalekuetan eta herriko kirol txapelketetan emakumeen presentzia eragitea da asmoa. Beasaingo festetan bukatuko da txapelketa.
Bikoteko kide batek, gutxienez, beasaindarra izan beharko du txapelketan parte hartzeko. Baina biak beasaindarrak izatea bultzatu nahi dute, ahalik eta txapelketa herrikoiena osatze aldera.
Izen-ematea zabalik dago urtarrilaren 2ra arte, Arranon edo QR kodigoaren bidez. Bikoteko 20 euro ordaindu beharko dira.
Eskuz binakakoa
Bestalde, laster emango diote hasiera eskuz binakako pilota txapelketa herrikoiari ere. Aurtengoa 14. ekitaldia izango da. Iazko aldaketei eutsiko diete, parte hartzea handitzeko eta txapelketa herrikoiagoa egiteko asmoz. Horretarako, lau bikoteko ligaxkak sortuko dira hasieran. Ligaxka hauetan, guztiek guztien aurka jokatuko dute, 75 gramoko pilota goxoekin, eta, ondoren, bi txapelketetan banatuko dira bikoteak; ligaxka bakoitzeko lehen bi bikoteek pilotari txapelketan parte hartuko dute (75, 85 eta 95 gramoko pilotak erabiliz) eta azken bi sailkatuek sasi-pelotari txapelketan (75 eta 85 gramoko pilotak erabiliz).
Hemen ere, izen-ematea urtarrilaren 2ra arte egin daiteke, Arranon eta karteleko QR kodigoaren bidez. Bikoteko 20 euro ordaindu beharko dituzte.
