Azahara Dominguez diputatuak Ormaiztegiko Zumalakarregi museoa bisitatu du
Atzo izan zen bisita, aldundiak sustatzen duen 'Zatoz eta zaindu' estrategia turistikoaren harira. Proiektu honek estandarizazio globalaren aurrean, berezi egiten gaituena indartzearen aldeko apustua egiten du.
Niko Osinalde, Lourdes Azpiazu, Azahara Dominguez, Jon Enrike, Libe Otegi eta Mikel Alberdi atzo, Zumalakarregi musoan. Hitza Mugikortasuneko, Turismoko eta Lurralde Antolaketako diputatuak, Azahara Domínguezek, Ormaiztegiko Zumalakarregi museoa bisitatu zuen atzo. “XIX. mendea ezagutzeko eta gozatzeko erreferentziazko ikerketa eta dibulgazio zentroa” dela azpimarratu dute aldunditik. Ezkioko Igartubeiti baserriarekin eta Donostiako Euskal Itsas Museoarekin batera, Gipuzkoako foru titulartasuneko hiru museoetako bat da Ormaiztegikoa. Bisitan, Jon Enrike Ormaiztegiko alkateak ere parte hartu zuen, eta Lurdes Azpiazu koordinatzailea izan zen anfitrioi lanetan. Bertan, bertako instalazioak eta museoaren oraingo eta etorkizuneko erronkak ezagutu ahal izan zituzten. Museoko artxiboko arduradun Mikel Alberdik eta Goitur museoko zuzendari Niko Osinaldek ere parte hartu zuten bisitan.
Zumalakarregi museoa Iriarte-Erdikoa etxean dago, XVIII. mendeko antzinako baserrian, eta XIX. menderako bidaia eskaintzen du, aldaketa sozial, kultural, ekonomiko eta politiko handiko garaira, hain zuzen. Museoaren bildumak Karlistaldietako pieza esanguratsuek osatzen dituzte, hala nola garaiko arma eta uniformeek, numismatikak eta prefilateliak, balio handiko dokumentu-funtsek eta beste dokumentu batzuek, bai eta fondo kartografikoek, plano mapek eta atlasek ere, besteak beste.
Zumalakarregi, gainera, topagune ere bada, “irekia eta gizarte osoarentzat irisgarria, eztabaida eta pentsamendu kritikoa sustatzen dituena, ikerketaren, ezagutzaren sorkuntzaren, hezkuntzaren, kontserbazioaren eta historiaren hedapenaren bidez, diziplinarteko ikuspegi berritzaile batetik”.
Eskaintzen dituen zerbitzuen artean daude, besteak beste, “dokumentu-informazioa eskatzea, ikertzaileei arreta ematea, irudiak digitalizatzea edo kontsulta espezializatuak egitea”. Bisita gidatuak, ibilbide tematikoak, tailerrak edo animazio-jokoak ere eskaintzen ditu.
Turismo bulegoa
Zumalakarregi Museoak, gainera, Goierri eskualdeko bederatzi turismo bulegoetako bat ere hartzen du. Urtero 85.000 bisita inguru izaten ditu, eta azken urteotan nabarmen hazi da nazioarteko turisten kopurua. “Eskualdera iristen den bisitariaren profilak — horietako asko naturak, kulturak eta mendi-ibilbideek eragindakoak, eta txangoak eta museoak bisitatzea konbinatzen dituztenak — ekipamendu horiek lurraldearen historia azaltzeko eta kontakizun propioa eta bereizia eskaintzeko duten garrantzia berresten du”, nabarmendu du diputatuak. “Goierriko turismo-bulegoak Estatuko eta atzerriko bisitarientzako sarrera-ateak dira, eta horien kopuruak etengabe hazi dira, Zumalakarregi bezalako zentroek gure nortasunaren transmisioan eta eredu turistiko benetako eta orekatu baten sendotzean duten papera indartuz”, berretsi du.
Azahara Domínguezek hausnartu duenez, “gurea babestu nahi badugu, gure lurraldearen historia kontatzen duten lekuak zaindu eta indartu behar ditugu. Zumalakarregi Museoa bezalako ekipamenduak ezinbestekoak dira gure historia eta berezitasuna bizirik mantentzeko eta proposamen turistiko propioa eraikitzeko, nortasuna duena eta gizarte gisa definitzen gaituzten balioetan sakonki errotua dagoena “.
“Helmuga askok elkarren antza izateko arriskua duten une honetan, nor garen eta nondik gatozen azaltzen duten espazioak zaindu eta indartu behar ditugu. Historia, ondarea eta sustraitzea ez dira baliabide kulturalak soilik; estandarizazioaren eta berezitasunaren galeraren aurrean dugun defentsarik onena dira”, gehitu du.
Horregatik, Mugikortasuneko, Turismoko eta Lurralde Antolaketako Departamentutik lehentasunezkotzat jotzen dute horrelako ekipamenduak indartzea eta horiei balioa ematea, “ikuspegi benetakoa, iraunkorra eta lurraldearen memoriarekin lotua eskaintzen baitute”. Baliabide horiek babesten eta sustatzen jarraituko dutela adierazi dute, “funtsezkoak baitira turismo-eredu orekatu, errespetuzko eta gure sakoneko batean”.
Bestalde, Lurdes Azpiazu museoko koordinatzaileak adierazi duenez, “1989an ireki zenetik, museoa pixkanaka aldatuz joan da, inguruneko aldaketetara eta sektorearen eta herritarren behar berrietara egokituz”. Azken urteotan museoaren diskurtsoa aberastuz joan da ikuspegi berriekin, “narrazio historikoaz haratago balio unibertsalei buruzko hausnarketa berriak proposatzen dituzten gaietara irekiz, hala nola bakea, bizikidetza, aniztasuna, lankidetza, eta abar. Diskurtso horiek, era berean, beste diziplina batzuei lotutako programa eta ekintza berriak sortu dituzte, dimentsio garaikide batetik”.
Horren guztiaren ondorioz, gaur egun museoa “kokatzen den testuinguruan eta ingurunean funtsezko kultura-eragile” gisa kokatzen da. “Urteko kultur programazio egonkorra eta etengabeko berrikuntzan oinarritutako egiteko moduak sendotu ditu, bere jarduerak tokiko eta eskualdeko erakunde eta elkarteekin lotuz, egunero museoa inguratzen eta sustatzen duten herritarrengana hurbilduz”, adierazi du.
