Azari, 100 urte «ehiza jasangarria» sustatuz
Ordiziako elkarterik zaharrenak, Azari ehiza eta arrantza elkarteak, mendea bete du. Herritarrekin batera ari da 100. urteurrena ospatzen eta datozen hilabeteetarako hainbat ekimen iragarri dituzte.
Miguel Lazpiur eta Maixabel Usabiaga.Hitza Ordiziako elkarterik zaharrena da Azari, ehiza eta arrantza zaleen bilgune historikoena. 1926ko martxoaren 14an sortua, ehiza eta arrantzarekiko zaletasun handia zuten hainbat ordiziarrek bultzatuta, ehizaren kudeaketa antolatzeko beharretik abiatu zuen elkarteak bere ibilbidea. 100 urte geroago, helburu berari eutsiz baina garaien arabera egokituta, komunitatearekin batera ospatu nahi izan dute mendeurrena.
Ospakizunei hilaren 6an eman zieten hasiera, eta momentuz uztailera arte luzatuko den egutegia osatu dute. Egitarauan, urteotan egindako jardueren jarraipena diren ekintzak ez ezik, berrikuntza nabarmenak ere txertatu dituzte. Lehen hitzordua elkartearen historiari eskainitako erakusketa izan zen, irudien bidez 100 urteko ibilbidea jasotzen duena; Barrenan ikusgai dago hilaren 29ra arte. Inaugurazioak eman zion hasiera ofiziala mendeurrenari, eta ordutik hainbat hitzaldi eta solasaldi ere egin dituzte.
Urteurrenaren egunean bertan ere, joan den larunbatean, belaunaldi arteko topagune bilakatu zen Beti Alai frontoia. Maixabel Usabiaga elkarteko kideak «hunkigarritzat» jo du jardunaldia, adin guztietako herritarrak elkartzea lortu baitzuten. Egitarau oparoa izan zen: arku tiraketa, field target modalitatea eta uso mezularien erakustaldiak eskaini zituzten, eta parte hartzeko aukera ere eman zitzaien bertaratutakoei. Horrez gain, arrantzarako eulien muntaketari buruzko tailerra antolatu zuten, eta elkarteko kideei oroigarri bana eman zieten mendeurrenaren harira.
Herritarrei zabaldua
Hala ere, datozen hilabeteetarako ere hainbat ekimen garrantzitsu aurreikusi dituzte. Maiatzaren 16an, Idiazabal Gaztaren Kofradiak Ohorezko Kofradiakide izendatuko du Azari elkartea. Ekainaren 5ean, ehiza txakurrei buruzko solasaldia egingo dute Barrenan, eta biharamunean, ekainaren 6an, ohiko bazkide eguna ospatuko dute: goizean Ehiza txakurren erakustaldia egingo dute Oiangu txikiko zelaian, eta ondoren bazkideen arteko bazkaria izango da. Uztailaren 24an, berriz, Ordiziako jaietako txupinazoan parte hartuko dute; danborradan, gainera, omenaldi xumea ere jasoko dute, elkartearen parean geldialdi berezia eginez eta Ordiziako Martxa joaz. Azkenik, uztailaren 31n amaituko dituzte ospakizunak, usakume jaurtiketarekin, Euskadiko Koparen baitan.
«Sozialki [ehiza] ez dago ondo ikusia, baina gure esku dago jarraipena ematea»
Maixabel Usabiaga. Azari elkarteko kidea
Ehiza jasangarria
100 urteko ibilbidean «aldaketak» jasan baditu ere, hasierako «helburu berari» eusten jarraitzen diola azaldu du Usabiagak: ehiza jasangarria sustatzeari. Inguruak zein basoak zaintzea eta ehiza zertxobait gehiago kontrolatzea izan dira asmo nagusiak beti. 82 bazkide dira orain, eta ehiza zein arrantza mantentzea eta sustatzen jarraitzea da euren asmo nagusia. Horretara begirako ekintzak aurrera eramaten dituzte, baina izaten dira ere helburu horretatik gehiago aldentzen diren ekintzak ere: mus txapelketak, danborrada gaueko afariak…
Hasierako helburua
Mende bateko ibilbidean aldaketak izan badira ere, hasierako xedeari eusten diotela nabarmendu du Usabiagak: ehiza jasangarria sustatzea. Ingurunea eta basoak zaintzea, eta jarduera bera modu arduratsuan kudeatzea izan dira beti ardatz nagusiak. Gaur egun 82 bazkide ditu elkarteak, eta ehiza zein arrantza sustatzen jarraitzea dute xede. Horretarako jarduerak antolatzeaz gain, bestelako ekimen sozialak ere egiten dituzte, hala nola mus txapelketak edo jai giroko afariak.
Etorkizunerako transmisio
Etorkizunari begira, erronkak ere mahai gainean daude. Ehizak gaur egun bizi duen egoera sozialaz ohartarazi du Usabiagak, eta belaunaldi arteko transmisioaren garrantzia azpimarratu du: «Sozialki ez dago ondo ikusia, baina gure esku dago jarraipena ematea». Ildo horretan, ehiza Euskal Herriko kulturaren parte dela defendatu du, eta ondare hori bizirik mantentzea dela elkartearen egiteko nagusietako bat.
Horrela, iraganari aitortza egin eta etorkizunari begira, Azari Elkarteak 100 urteko bidea ospatzen jarraitzen du, komunitateari lotuta eta tradizioari eutsiz, belaunaldi berriei lekukoa transmititzeko asmoz.
