Ilusioa berreskuratzeko helburuarekin ekin dio Ampo Ordiziak denboraldiari
Ampo lantegiaren egoitzan egin dute OREko lehen taldearen aurkezpena.
Ordiziako Rugby Elkarteko lehen taldeak 2016-17 denboraldiaren aurkezpen ekitaldia egin du gaur, Ampo enpresaren egoitzan. Bertan izan dira OREko zuzendaritza taldekoak eta Ampo Ordiziako hainbat jokalari, Ordiziako Udaleko eta Gipuzkoako Foru Aldundiko ordezkariekin batera. Iluntzeko 19:00etan, berriz, Ordiziako Plaza Nagusian egingo dute klubeko talde guztien aurkezpena, herritarren eta afizioaren aurrean.
Gaurko agerraldian azaldu dutenez, pasa den denboraldian OREk berrantolaketa sakona izan zuen. Iñaki Galparsoro zuzendaritzako ordezkariaren hitzetan, «klubari indarra» eman nahi izan diote, eta zuzendaritza mailan «antolaketa berria» jarri dute martxan. Bi arlotan eratu dute kluba: «arlo ejekutiboa eta kirol arloa»; bigarren hau, «jokalari ohiek» osatzen dute.
Joseba Otamendi, kirol arduradunak berriz, «bide berri bat» eraikitzen saiatu direla azaldu du. «Beharrezkoa zela uste bait genuen eta horrela klubaren funtzionamendua hobetzea espero dugu, bai estrukturaren aldetik eta baita beste arlo guztietan ere». Kirol arloko zuzendaritza «klubarekin lotura izan duten sei pertsonek» osatuko dutela gehitu du. Ordizia Rugby Elkartearen arabera, «taldearen ilusioa berreskuratzea» da denboraldiko helburuetako bat.
