Igandean Usurbeko Igoera jokatuko da 11:30ean. Juan Esnaola eta Maria Azuzena Sodupe omenduko dituzte. Aizkorri elkartekoek bat egingo dute festarekin
Gantzarain baserriko Juan Esnaola eta Maria Azuzena Sodupe omenduko dituzte igandean.
Iraileko lehenengo asteburua iristearekin batera, Beasainmendiko auzotarrek festa eguna antolatu dute iganderako. Agorta izango da beste behin ere festa leku nagusia. Larunbatean, 21:00etan, prestakuntza lanak bukatu ondoren, herri afaria eta auzoko mus txapelketa izango dituzte. Igandean, berriz, 08:00etako suziriek gogoraraziko dute Usurben festa eguna dela. Jarraian, Usurbeko gurutzean, 10:30ean herri meza egingo dute Laja eta Larrañaga trikitilariekin eta Mikel Mendizabal eta Iker Zubeldia bertsolariekin. 11:45ean, Aizkorri Elkartekoei ongi etorria egingo diete.
Eguerdi partean, Agortan jarraituko du festak. 12:00etan, trikitilarien eta bertsolarien saioak izango dira eta 13:00etan, Gantzarain baserriko Juan Esnaola eta Maria Azuzena Sodupe senar-emazteei omenaldia eskainiko diete auzotarrek. Esnaola 1945eko apirilaren 14an jaioa da Gantzarain baserrian. Sodupe, berriz, 1947ko apirilaren 2an, Itsasondoko Iraola baserrian. Gabon eskean ezagutu zuten elkar Iraola baserrian, eta ondorengo inauterietan Juanek Maria Azuzenari etxera lagundu zion eta han hasi zuten urte luzeetako harremana; Juanek 18 urte zituen eta Mariak 16. Duela 48 ezkondu ziren eta bi seme-alaba eta bi biloba dituzte. Omenduek oparia jaso ondoren, Jokinen oroimenean aurreskua dantzatu eta lora eskaintza egingo dute.
Herri kirolak ere izango du tartea igandean Agortan. Iñaki Azurmendi eta Arkaitz Jauregi aizkolariak eta Joseba Esnaola harrijasotzailea ariko dira. 14:30ean, bazkari herrikoia izango da. Bazkarirako txartelak Arrano tabernan (943 88 74 47) eta Iñaki harategian (943 88 27 47) eros daitezke. Arratsaldean, azkenik, 17:00etan haur jolasak eta 18:30ean erromeria izango dira.
Aizkorrikoen mendi irteera
Ohi bezala, Aizkorri Mendizale Elkartekoek bat egingo dute Usurbeko festarekin. Ikasturte berriko lehenengo irteera egingo dute Zumarragatik Beasainmendira. Zumarragara autobusez joango dira 07:30ean Gipuzkoa plazatik abiatuta. Parte hartu nahi dutenek izena eman beharko dute ostiralean, elkar-tean, 19:00etatik 20:00etara.
