Korrika 17-ren aurkezpena, Lazkaon
Korrika badator eta gaurtik aurrera hasiko dira herriz herri, antolaketa lanetarako batzordeak sortzen. Goierrin euskalgintza arloan diharduten hainbat eragile elkartu ziren ostiralean Lazkaoko beneditarren artxiboan, ekimena aurkeztu eta goierritarrei parte hartzeko deia egiteko. AEK-ko ordezkariez gain, Joan Joxe Agirre, Dionisio Amundarain, Belen Maiza, Andoni Sarriegi, Mikel Mendizabal eta Marian Bidegain bildu ziren, besteak beste.
Korrikak 1980. urtean egin zuen lehen ibilbidea, eta dagoeneko, 17. edizioa beteko du euskararen aldeko martxa ezagunak. 2011ko apirilaren 7an aterako da Trebiñutik eta 17an iritsiko da Donostiara. Goierrira berriz, apirilaren 13an iritsiko da. Egun horretarako dena prest izan nahi dute ordea, eta aste honetan hasiko dira herriz herri Korrika batzordeak sortzen. Hau da bileretarako jarri duten egutegia:
- Astelehena, 24: Lazkao eta Olaberria
- Asteartea, 25: Legorreta
- Asteazkena, 26: Beasain
- Astelehena, 31: Ataun
- Otsailak 1, asteartea: Ordizia
Goierriko Korrika 17ren arduraduna da Nekane Munduate ataundarra. Prentsaurrekoan azaldu zuenez, “modu askotara parte har daiteke Korrika 17n”. Batetik, datozen asteotan eratuko diren batzordeetan parte hartuz. Bestetik, laguntza ekonomikoa emanez. Bide asko daude horretarako: Korrika laguntzaile egitea, materiala edo kilometro bat erostea edota dirulaguntza ematea Euskadiko Kutxan zabaldu den 30350072020720037810 kontuan.
17.edizio honetan omendua
Euskaltzaindia izango da. “Horrez gain, ezin ahaztu helduen euskalduntze eta alfabetatzea oro har, eta Korrika antolatzen duen AEK bera, nondik datozen. Ezin ahaztu Euskaltzaindiaren babesean sortu zirela, eta Rikardo Arregik 1966an alfabetatze taldeak sortzeko eskatzen idatzi zuen gutunetik hona, horrenbeste izan direla helduen euskalduntzean nabarmendu diren euskaltzainak”. Nekane Munduatek azaldu zuenez, “gure eskualde honetan ere hainbat lan egin da, bai. Euskalgintzaren enborrak eman du adarrik Goierrin. Lehen gau eskola, euskalduntze-alfabetatzeak eta orainak; lehen Ikastola eta oraina; lehen bertso eskola eta oraina”. Hori guztia dela eta, aurkezpenean egon zirenak goraipatu zituen Munduatek.
