Roland Holkek irabazi du Gabiriako rallyesprintean, ofizio handia erakutsita

Roland Holke gidari beterano donostiarrak irabazi du Gabiriako XIV. Rallyesprinta. Euripean jokatu zen, herenegun arratsaldean, bigarren aldiz Legazpi-Gabiria norantzan. Hiru erlojupekoetan erregulartasun erabatekoa erakutsi zuen Holkek, Mitsubishi Lancer IX ahaltsuarekin eta Aintzane Goñi gidari-ondokoa lagun. Hogei urteren ondoren, iaz itzuli zen Holke lehiaketara, Gabirian hain justu. Igandean, zortea lagun, gidari gutxik dezaketena egin zuen: zati bakoitza denbora berean iltzatu, hiru zatietatik bitan garaitu —lehenean Zapirain izan zen azkarrena—, eta goitik bukatu lasterketa. 4:40.6, 4:40.4 eta atzera 4:40.60 minutuan geratu zuen kronometroa 6,65 kilometroko zatietako bakoitzean. Lortu ez zuen bakarra zatiko errekorra ontzea, iaz Ander Vilariñok ezarria bigarren pasaeran (4:27.6). Ofizio handiko gidaria da Holke rallyetan. 1990era arte Espainiako Rallye Txapelketetan aritu zen, eta Europako beste proba batzuetan ere aritu izan zen. Montecarloko Rallyan (Monaco), esate baterako, bi aldiz parte hartua da, eta batean seigarren egina. Asturiasko erregularitate txapelketa irabazi zuen, 1995ean. “Denak zirika nituen inguruan, berriz noiz hasi behar nuen. Eta, tira, aurten 55 urte beteko ditut, hori ere ez da bromatakoa, eta dohainak ditudan bitartean beste urte batzuk ibiliko naiz. Egia esan, gozatu egiten dut”, zioen Roland Holkek, igande iluntzean, behin rallyesprinta irabazita. Itzuleraren ondorengo bigarren garaipena du, iazko beste baten ondotik. Mitsubishi Lancer Evo IX autoa iaz eskuratu [...]

Goierri Mendebaldeko Hitza

Gabiria,Segura

2012/03/06

Roland Holke eta Aintzane Goñi, Mitsubishi Lancer IXarekin, lasterketan. Arg.: Aimar Maiz

Hogei urteren ondoren, iaz itzuli zen Holke lehiaketara, Gabirian hain justu. Igandean, zortea lagun, gidari gutxik dezaketena egin zuen: zati bakoitza denbora berean iltzatu, hiru zatietatik bitan garaitu —lehenean Zapirain izan zen azkarrena—, eta goitik bukatu lasterketa. 4:40.6, 4:40.4 eta atzera 4:40.60 minutuan geratu zuen kronometroa 6,65 kilometroko zatietako bakoitzean. Lortu ez zuen bakarra zatiko errekorra ontzea, iaz Ander Vilariñok ezarria bigarren pasaeran (4:27.6).

Ofizio handiko gidaria da Holke rallyetan. 1990era arte Espainiako Rallye Txapelketetan aritu zen, eta Europako beste proba batzuetan ere aritu izan zen. Montecarloko Rallyan (Monaco), esate baterako, bi aldiz parte hartua da, eta batean seigarren egina. Asturiasko erregularitate txapelketa irabazi zuen, 1995ean. “Denak zirika nituen inguruan, berriz noiz hasi behar nuen. Eta, tira, aurten 55 urte beteko ditut, hori ere ez da bromatakoa, eta dohainak ditudan bitartean beste urte batzuk ibiliko naiz. Egia esan, gozatu egiten dut”, zioen Roland Holkek, igande iluntzean, behin rallyesprinta irabazita.
Itzuleraren ondorengo bigarren garaipena du, iazko beste baten ondotik. Mitsubishi Lancer Evo IX autoa iaz eskuratu zuen, lehen erabiltzen zuen Seat Leon ibilgailua Azpeitiko rallyan puskatu ondoren. Probatu gabe zeukala esan du, eta eskua hartzen ari dela. “Hasieran kotxea ez zegoen batere ondo, baina pixkanaka hobetu genuen. Oraindik bada behar bezala geratu ez den gauzarik. Dena konponduta neukan gaurko [iganderako], baina doikuntzak aldatu zizkidaten eta eramateko zail samarra egin zait lehen erlojupekoan. Orduan ikusi dugu autoa aurretik ez zela sartzen; gauza pare bat aldatu ditugu, atzeko esekidura, gurpilak, eta bestela gidatuz, defenditu dugu geure burua”, azaldu du igandeko lana.

Gabiriako lasterketa “konplikatua” dela aitortu du. “Lehen zatian irristatzen ez zen lekuan, bigarrenean bai, hirugarrenean harri-kozkorrengatik okerrago… Alde batean galdutakoa bestean irabaz zitekeen, eta ondo”. Hain zuzen, hiru erlojupekoak kalkatu egin ditu, denbora aldetik.

Holke, xanpaina astintzen, Zapirain txapeldunordea begira duela. Arg.: A. Maiz

Txapeldunorde Joseba Zapirain eta debuta egin zuen Ane Zapirain aita-alabak sailkatu ziren, Peugeot 206 WRCarekin, aurten probako world rallye car bakarra. Lidertzan jarri ziren, 4:38.8rekin, baina 9 eta 8 segundo galdu zituzten hurrengo pasaeretan Holkerekiko. David Ardions, gainera, jokoz kanpo geratu zen berehala, lehen ekinaren ondoren bigarren sailkatuta zegoela (4.39.9). Podiumera seigarren aldiz igo da Zapirain, 2003an, 2005ean eta 2010ean bigarren eta 2009an eta iaz hirugarren baitzen.

Joseba eta Ane Zapirain, txapeldunordeak. Beren Peugeot 206 WRCa izan da aurten 'world rallye car' bakarra. Arg.: A. Maiz

Podiumeko hirugarren koska Joxe Labaka-Aitor Otaegik hartu dute. Iaz txapeldunorde geratu ziren Gabirian, baina urte bukaeran euskal rallyetako txapeldun izan ziren azpeitiarrak.

Joxe Labaka-Aitor Otaegi azpeitiarrak (Mitsubishi Lancer Evo V), jendetza aterkipean begira dutela, bigarren erlojupekoan. Arg.: A. Maiz

Euriak baldintzatuta
Lehen zatiaren erditik aurrera ia etenik gabe bota zuen euriak asko lausotu zuen rallyesprintaren joana. Taldeek nozitu zuten eguraldiaren erasana.
Azkenean 54 autok parte hartu zuten (60 zeuden izena emanda), eta 41ek bukatu. Istripuengatik sei taldek utzi behar izan zuten lehia, beste seik matxurengatik. Ezbehar ikusgarriena txapeldunaren seme Lucas Holkerena izan zen, itzulipurdia egin baitzuten Peugeot 206 XS estreinatu berriarekin. Eguna aparteko kalterik gabe agortu zen.
Goierritarren artean, Iñaki Sarasola-Aritz Usabiaga ordiziarrek (Saxo VTS) 4. bukatu zuten orokorrean, eta 4 multzoko garaile. Igor Izagirre-Jon Ander Pericacho urretxuarrek, Maikel Iriarte-Jon Lonbide legazpiarrek eta Ibon Arregi beasaindarrak eta Borja Gereñu segurarrak ere lan bikaina osatu zuten. Gazte onena Iriarte izan zen, eta bigarrena Arregi.

Maikel Iriarte, Gabirian bizi den legazpiarra, gazteen garaikurra jasotzen. Arg.: A. Maiz

Eguraldiak ikuskizuna zerbait lausotu zuen arren, eta bide bazterrean lau orduz egoteko giro atseginena ez eginda ere, milaka zaletu bildu dira zirkuituaren luzera osoan, asko bezperan joanak, edo asteburu guztirako. Euskal Herriko automobilismo denboraldiaren hasiera zen, eta neguko etenaldiaren ondoren irrikaz zeuden motorzaleak. Zirkulazio aldetik beste urteetan baino pilaketa gutxiago izan da. Antolakuntzak aurten ez du utzi zirkuituaren barruan aparkatzen, eta onerako nabaritu da neurri hori.

Ikusleak, zirkuituko gune erakargarrienetako batean. Arg.: A. Maiz

SAILKAPENAK
Orokorra

Roland Holke-Aintzane Goñi (Mitsubishi Lancer IX): 14:01.6
Joseba Zapirain-Ane Zapirain (Peugeot 206WRC) 14.9ra
Joxe Labaka-Aitor Otaegi (Mitsubishi Lancer V) 15.4ra
Iñaki Sarasola-Aritz Usabiaga (Renault Clio Sport) 44.9ra
5. Ander Barainka-Axier Korta (Peugeot 106 S16) 45.4ra
Igor Izagirre-Jon Ander Pericacho (Citroen Saxo VTS) 58.5era
Maikel Iriarte-Jon Lonbide (Citroen Saxo VTS) 1:00.7ra
Ibon Arregi-Borja Gereñu (Citroen Saxo VTS) 1:02.4ra
Ander Arana-Arkaitz Kobeaga (Peugeot 309 GTI 16v) 1:03.4ra
Gustavo San Juan-Rafa Mazariegos (Renault Clio Sport) 1:09.4ra

Gabiriak XIV. Rallyesprintaren ohorezko postuak: Joseba Zapirain-Ane Zapirain (2.ak), Aintzane Goñi-Roland Holke (irabazleak), eta Aitor Otaegi-Joxe Labaka (3.ak). Arg.: A. Maiz

Formula librea (10 multzoa)