Elurraren eraginpean agurtu ditu otsailak Ordiziako feriak. Handiena pasatu denaren zantzuak baldin badaude ere, bota duenak zer esana eman du, eta baita lanen martxa nabarmen mugatu ere . Saltzaile asko falta ziren eta zeudenetako batzuk komeriak izan dituzte barazkiak biltzen. Orendaingo Pepi Ayestaranek esan duenez, «geuk jateko ere porruak ezin aurkituz ibili nintzen, aza buruak ere ez ziren nabarmentzen; erabat berdinduta zegoen baratza». Aramako Patxi Arizmendik, berriz, «katuak bezala porruak elur artean bila» ibili dela zioen; umorerik ez zaie behintzat falta kontatzerakoan. Beraz, zeuden gehienak negutegi barnekoak ziren, edo lehenago bildutakoak.
Itziar Pildain (Urretxu, 1984) da aniztasun eta bizikidetza mahaiko dinamizatzaile berria. Urretxuko Udalak, momentuz, sei hilabeterako martxan jarri du proiektua. 2013ko urtarrileko erroldako datuen arabera, 391 etorkin bizi dira Urretxun, 33 nazionalitate ezberdinetakoak. Hori horrela, jaiotzez urretxuarrak direnen eta kanpotik bertara bizitzera etorri direnen arteko bizikidetza bultzatzea du helburu proiektuak.
Bilduk ez beste alderdi guztiek ez diete emendakinei babesik eman arrazoi teknikoak argudiatuta. Zumarragako osoko bilkurak berezitasun bat izan du oraingoan, EH Bildu koalizioaren baitako Aralar alderdiko Sebas Iturriotzek eta Josu Aztiriak hitza hartu baitute. 2013ko aurrekontuen gainean egindako ekarpenen gaineko bozketaren harira hitz egin dute. Aurrekontuei egindako emendakinen berri eman dute, aurretik Agurtzane Basabe Zumarragako Udaleko kontu-hartzaileak, «arrazoi teknikoak tarteko» EH Bilduk aurkeztutako 37 ekarpenak atzera botako zituztela iragarri badu ere.