Legazpiko Gazteak pilota eskolak hainbat txapelketa antolatu eta jokatuko ditu urtea hastearekin batera. Bihar arratsaldean, esaterako, Gipuzkoako Binakako Txapelketako partidua jokatuko dute Legazpi 2 eta Azkoitia taldeek. Urbeltz pilotalekuan izango da norgehiagoka, 19:00etan hasita. Etzi, bestalde, Legazpiko IV. Binakako Txapelketako azken jardunaldiak jokatuko dituzte benjaminen, kimuen eta haurren mailan. Partidei 17:00etan emango zaie hasiera Urbeltzen.
Horrekin batera, Binakako VIII. Pilota Txapelketa herrikoirako izen emateko epea datorren astelehenean, hilak 13, irekiko dela jakinarazi du elkarteak. Izena Laubide, Oilarra, Katilu, Urbeltz Giroa eta Karibe Zaharra tabernetan eta gaztetxean eman daiteke. Bikoteko 20 euro ordaindu beharko da eta gutxieneko adina 16 urte izango da.
Amaitzeko pilota elkartetik herriko pilotari gazteak zoriondu nahi izan dituzte Gabon garaian jokatutako txapelketetan emandako mailagatik. Urretxuko Gabon Kopan finaletan herriko pilotari asko iritsi ziren. Gainera, Zestoan jokatu den Gipuzkoako Banakako Txapelketan (irudian) Arkaitz Garmendia txapeldun izan zen Ansorregi azkoitiarrari 16 eta 5 irabazi eta gero.
