Esku pilota ikastaro berezia eskainiko du Maizpidek Udako Ikastaroen barruan
Esku pilotan trebatzeko ikastaro berezia eskaini du Lazkaoko Maizpide euskaltegiak, Udako Ikastaroen barruan. Datorren astelehenean hasiko dira ikastaro bereziak, eta pilotan trebatzeko saio bereziak ere egingo dituzte, hala nahi dutenentzat. Ohi bezala, uztailean, abuztuan eta irailean euskara ikastaroak eskainiko ditu Maizpidek. Hamabost egunekoak eta «trinko-trinkoak» izango dira, Jon Urdangarin zuzendariak aurreratu duenez. «Asteburua barne hartuko dugu. Ikasleek egunean zortzi ordu emango dituzte klasean, eta igandean txangotxo bat egingo dute inguruko parajeren batera».
Urtero bezala, euskaltegian bertan jarduera ugaritan parte hartzeko aukera izango dute ikasleek: euskal musika, txalaparta ikastaroa, eskulanak, paseoak… Hiru hilabeteetan, gainera, kultura ekitaldiak ere jarriko dituzte, irekiak. Uztaileko saioak Lazkaoko plazan izango dira; abuztukoak eta irailekoak, Maizpiden.
Pilota, berritasuna
Euskara ikastaroen egonaldia xamurtzeko, eta euskara noranahikoa dela erakusteko, 22na, euskara eta pilota ikastaroa sortzea pentsatu du Maizpidek. Uztailaren 14tik 25era izango da ikastaro berezia.
Goizetan euskara landuko dute ikasleek, Maizpiden. «Klaseak ia-ia besteetan bezala izango dituzte, nork dagokion mailan. Arratsaldean elkartuko ditugu kurtso horretan matrikulatzen direnak, pilotaren inguruan aritzeko», aurreratu du Urdangarinek.
Pilotaren lanketan, entrenamendu fisikoa eta teknika jorratuko dituzte. Lazkaoko Kemen kirol osasun zentroko Etor Mendia arduratuko da atal fisikoaz, eta Lazkaoko Lapke elkarteko kideak, Jabi Gelbentzu buru dela, arlo teknikoaz. Ikasle taldea osatutakoan erabakiko dute zer mailatatik hasi eta noraino sakondu.
Sasoian jartzeko entrenamendu fisikoak egingo dituzte, egun biz behin. Besteetan, pilotako teknikekin ariko dira. Pilota gozoekin jokatuko dute, frontoian, Gelbentzuk esan duenez.
Jon Ander Albisu pilotari profesional ataundarraren bisita ere jasoko dute egun batean, eta baliteke Ekaitz Saralegi amezketarra ere etortzea.
Ikastaro teoriko-praktikoa izango da. Teoriaren atalean, pilotaren inguruko hiztegia, kirolarien elkarrizketetan euskaraz nola jardun, edo kirol horren berriak landuko dituzte.
Nola pilotarekin lotutako euskara ikastarorako, hala uda guztiko sei kurtsoetarako, izen-emate epea zabalik du Maizpidek. Euskaltegira joanda edo webgunean (maizpide.com) dago aukera.
Udako Ikastaroetako pilota entrenamenduen aurkezpenean, Jabi Gelbentzu, Jon Urdangarin, Etor Mendia, Jon Ander Albisu eta Azeari Andonegi./Aimar Maiz
