Beasainen auzo-konposta egiten duten gune bakarra dago, Zaldizurretako biribilgunearen ondoan, eta bederatzi hilabete beteta, atzo arratsaldean hustu eta bizilagunen artean banatu zuten. Horretarako, denen artean hilabeteetan bildutako konposta galbahetu egin zuten, eta zati handienak atzera konpostagailura itzuli zituzten. Galbahetik pasa eta garbi geratu zen konposta, berriz, konposta egin duten bizilagunen artean banatu zuten. Loreak ere banatu zizkieten eta mokadutxo bat eginez ospatu zuten lehen konposta ateratzea.
Sasietako kideek azaldu zutenez, iazko abenduan jarri zituzten konpostagailuak eta “nahiko berria bada ere, oso ondo daude”. Konposta atera aurretik analizatzera bidaltzen dute eta ateratzeko moduan dagoela ikusten badute soilik ateratzen dute.
