Igande honetan hasiko da Ordizian Barroko Aire jaialdia

Ordizian eta Ataunen izango dira musika emanaldiak igande arratsaldetan

Janire Arrondo

2014/11/06

Barroko Taldea Beasainen emandako kontzertu batean.

Asteburu honetan emango diote hasiera Barroko Aire Musika barrokoaren egunak jaialdiaren 29. edizioari. Lau kontzertu izango dira Ordiziako parrokian eta beste bat Ataungo San Martin elizan; 18.30ean hasiko dira emanaldi guztiak. Zikloari hasiera emateko igande honetan Donostiako Talde Barrokoak kontzertua eskainiko du Ordizian. Hilaren 16an Euskadi Brass metal taldeak emango dio jarraipena Ordizian; eta Gerardo Rifon organo-jolea eta Lucia Gomez sopranoa arituko dira Ataunen. Azaroaren 23an Ainhoa Garmendia sopranoa entzuteko aukera izango da Opus Lirica hirukotearekin. Programazioari amaiera emateko, berriz, hilaren 30ean Lux in Tenebris taldearen txanda izango da.

Erreferentziazko taldea. 1974. urtean sortu zen eta helburua musika klasikoa, eta bereziki, Barroko garaikoa ezagutzera ematea da. Donostian erreferentziazko talde instrumentala da; gaur egun Sergio Zapirain dabil zuzendari lanetan. Aurkeztuko duten programan, besteak beste, Bocherini, Haendel (Watermusic) eta Vivaldiren lau urtaroko Uda eta Negua lanak entzuteko aukera izango da. Besteak beste, Zumarragako Antioko Musika Jaialdian hartu du parte talde honek, baita Donostiako Musika Hamabostaldian edo Bach Musikaldian ere. Aurten, gainera, sorreraren 40. urteurrena ospatzen ari dira eta Errenteriako Karnaba Zortzikotearekin eta Donostiako Txistularien Bandarekin emanaldiak egingo dituzte.

Ordiziako Udaleko Kultura sailetik gonbidapena luzatu dute “barrokoarekin gozatzeko aukera erakargarriaz” gozatzeko. Udalarekin batera, Gipuzkoako Aldundiak antolatu du Barroko Aire jaialdia. EGITARAUA Ordizia, 18.30ean eliz parrokian.