Goierriko sagardogileen iritziz, aurtengo sagardoa fruta usain handikoa, kolore argikoa, iaz baino gorputz gutxiagokoa eta alkohol graduz baxuagoa dator. Oso «edan erraza» dela aitortu dute gehienek. Ziriko sagardoaren jarioa hasi da. Sagardogintzaren artea zaindu, hobetu eta goierritar guztiei eskaintzeko prest dira Goierriko zortzi sagardotegi. Batzuek jada denboraldia hasita dute, besteek egunotan ekingo diote. Aulia eta Otatza maiatzera arte egongo dira, besteek urte osoa edukitzen dute zabalik. Lehengaiari eta produktuari arreta jarriz, zazpi sagardogilek zer-nolako edaria egin duten azaldu diote GOIERRIKO HITZAri.
Jose Antonio Iparragirre (Otatza, Zerain)
Ona dator. Gorputza joan den urtean baino gutxixeago dauka. Garagarrilean eta uztan euria egin zuen asko, eta eguzkia gutxi. Horrek eragin pixka bat eman du, baina udazkena oso ona egin zuen. Sagarra urri atzenaldera bildu genuen, eta ordurako ia eguzki pixka bat hartu zuen.
Jose Antonio Iparragirre, Zeraingo Otatzakoa./Aimar Maiz
Gerora etorriko da sagardoa aurten. Iaz hasieratik egina zegoen. Iaz hemen Goierrin sagar gutxi izan zen, eta Frantziatik ekarri genuen; gorputza gehixeago zeukan. Hemengo sagarrarekin mehexeagoa ateratzen da. Nik neuk ez dut sagarra kanpotik ekarri, dena bertakoarekin egin dugu. Nahasteko nahi nuen pixka bat, baina ez zegoen ekartzerik. Sagardotegi handiek ere ezin zuten lortu, eta Poloniatik eta urrutitik ibili dira ekartzen. Aurten alarma eman du sagarrak. Beti esaten ari ginen, Europan sagarra Frantzian zegoela, eta hark huts egiten zuenean arazoak izango genituela. Eta aurten jada izan da arazoa. Nik uste, sagarra hemen dagoela aldatu beharra, eta lan gehiago egin sagastietan, segurtasuna edukitzeko. Nafarroan eta Errioxan mahastiak bertan dauzkate, beren produktua daukate. Goierrin bastante daukat jarrita, baina ez naiz osatzen, eta hori arazo bat da. Aurrera, sagardotegiek segitu behar badute, sagarrarekin lana egin beharko da. Zeren, sagardoa egiten sagastitik hasten da. Lehengaia ona baldin badaukazu, genero ona ateratzen da. Ez badaukazu ona, nahiko arazo izaten dira hura konpontzen.
Denboraldia: Gu familia motza gaude eta maiatzera arte izango dugu irekita. Maiatzaren aurrenean itxiko dugu. Gero botilan saltzen dugu urte guztian. Hor dago gerra.
Iñaki Begiristain (Aulia, Legorreta)
Aurtengo sagardoa egiteko bertako sagarra asko erabili dugu, %75 edo. Sagar uzta nahiko aurrera etorri da hemen, eta sagardo egiten 2-3 aste lehenago bukatu dugu, beste urteekin konparatuta. Graduazio gutxixeago dauka, alkohol gutxixeago. Gorputz gutxiagokoak dira, argiak eta oso edan errazak. Gero, nola sagarra azkarrago egin den, nola ez den hain heldua izan, aroma aldetik afrutatuagoak eta oso sagardo atsegingarriak eta edan errazak atera dira.
Iñaki Begiristain, Legorretako Auliakoa./Aimar Maiz
Aulian iazko martxan segiko dugu. Abenduaren 13an ireki genuen, ohi bezala. Nahiko poliki egin dugu lan orain arte. Ikaztegietan eta Aulian astean zehar bezeroak kotxerik gabe sagardotegira lasai etorri ahal izateko mikrobus eta taxi zerbitzua jarri dugu. 6 euroren truke, Ibarratik Zumarragara bitartean, aurrez enkargatuta, jendea ekarri sagardotegira eta bere herrira eramango du atzera, aurrez hots eginda.
Haritz Eguren (Oiharte, Zerain)
Dena bertako sagarrarekin egindakoa da. Betiko sagardoa egin dugu, konbentzionala. Baina baita Label-ekoa eta ekologikoa ere. Gure etxean hiru sagardo proba litezke. Horrez gain, mosto pasteurizatua ere egin dugu, umeentzako-eta, sagardotegian emateko.
Sagardoaren ezaugarriak: bertakoa izanik, kolore argixeagoa, txinpartaz ondo, eta gorputza baita ere. Agian iaz adina ez, baina ez dago gaizki. Eta alkohol gradu baxuxeagokoa da. Baina edan erraza da, eta trago batek beste bat egiteko gogoa ematen du, eta hori seinale ona da.
Berritasunak dugu sagardo ekologikoa, labela eta normala edukitzea. Bodega txikia izanik, gure helburu kalitatea eta produktua dibertsifikatzea dira. Helburu horrekin gabiltza.
Haritz Eguren, Zeraingo Oihartekoa./Aimar Maiz
Larunbat honetan (urtarrila 17) irekiko dugu txotx denboraldia, iluntzean. Bertsolariak izango dira, Iker Zubeldia eta Julio Soto. Eta herriko trikitilariak. Aurten ere garraio zerbitzua izango da Zerainen. Otsailaren 7an hasiko da. Hots egin, sagardotegian bertan enkargatu hainbeste lagun, autobusez, halako lekutatik; eta gero koordinazioa guk egiten dugu, bi sagardotegien (Oiharte eta Otatza) artean. Asteburuetan bakarrik izango da zerbitzu hori, ostirala eta larunbata.
Hasieran beti baikor ikusten da denboraldia. Gauza asko egoten dira gero tartean. Elurrak ere asko eragiten du. Elurte bat egiten badu, jendea asko atzeratzen da, eta asteburu bat galtzeak asko esan nahi du. Denboraldia nola motza izaten den, 15 egun kentzeak parte handi bat izorratzen dizu.
Amaia Blazquez (Tximista, Ordizia)
Gu oraindik ez gara ekoizleak. Orain dela hamar urte bi hektarea landatu genuen, bertako sagarrarekin, Diputazioak aholkatuta. Datorren urterako jada martxan hasteko asmoa daukagu gure sagardo ekoizpena. Produkzio txiki batekin hasiko gara. Sagastiak Ataunen eta Getarian dauzkagu; nahiz eta arraroa iruditu, Getarian ere bai. Esperientzia oso polita da. Senarrak eta biok eramaten dugu sagardotegia, eta garbi geneukan sagastia jartzea, ilusioz handiz.
Amaia Blazquez, Ordiziako Tximistakoa./Aimar Maiz
Kanpoko sagardoa ekartzen jarraituko dugu, hain ausartak ere ez gara eta, gurearekin bakarrik hasteko. Sagardogintza ikasten ari gara, Fraisoron. Oso animatuta gaude. Orain, eta betidanik (30 urte dira jada), Zelaiatik ekartzen dugu. Berarekin jarraituko dugu, printzipioz. Baina gure kupelatxoa sartuko dugu sagardotegian, eta pixkana joango gara, ilusio handiz. Urte guztian irekita edukitzen dugu sagardotegia.
Demetrio Terradillos (Urbitarte, Ataun)
Gustura gaude aurten atera den sagardoarekin. Oso-oso edan errazak dira. Taninoz ez da hain fuertea izan. Gero botilan arazo gehiago ematen du horrek, baina txotxetik edateko oso-oso onak daude.
Azkena egin genituenak, azaroaren hasieran egindakoak, horiek beranduxeago datoz. Baina hasieran egindakoak, irailaren bukaeran-eta, ia eginda daude, esateko. Gainera botilatzen hasita nago ni.
Demetrio Terradillos, Ataungo Urbitartekoa./Aimar Maiz
Urbitarten betiko martxan izango da denboraldia. Lehendik hasi ginen jana pixka bat ugaritzen. Saltsa berdean bai bakailaoa, kokotxak, tomatearekin… jartzen dugu. Jendeak eskatu egiten du, gainera. Irekita gaude urte osoan. Sagardo berriaren denboraldia urtarrilaren 10ean zabaldu genuen. Denboraldia maiatzaren erdira arte egiten dugu, baina egia esan gure etxea beti irekita egoten da. Eta normalki, kanpotik datorren jendeak, eskertu egiten du.
Garbiñe Garmendia (Etxezuri, Olaberria)
Etxeko sagarrarekin egin dugu dena aurten ere. Barrikarako eta txotxerako bakarrik egiten dugu sagardoa, ez dugu botilatzen. Ekoizpena txikiagoa da, horregatik. Gero, sagarra Astigarragara saltzen dugu.
Garbiñe Garmendia, Olaberriko Etxezurikoa./Aimar Maiz
Oso itxura ona dakar aurtengoak. Gustatu zaigu. Agintzen du nola datorren. Oraindik ez dago puntuan, baina gustura gaude. Orain ari da jartzen. Kalitate onekoa da, fruta zapore handikoa eta txispa dauka.
Bi-hiru sagar barietate nahasten ditugu: txalaka (oso argia), goikoetxea (azido puntua) eta mokoa (taninoa ematen dio).
Jose Antonio Olano (Olagi, Altzaga)
Sagardoa ondo dator. Kanpoko sagarra ekarri dugu, eta ona atera da. Zaporez xumea agian, ez gazi eta ez gozo. Baina aparrarekin eta txinpartarekin. Eta desberdina; jendea agian ez dago ohituta beste gauza batzuk edatera. Label-erako sagarrak dauzkat, eta handik nahastu beharra izan dut zerbait; gorputz pixka bat eman eta kolorea irabazi du. Oso sagardo garbia eta polita atera da. Gertatzen dena da pixka bat desberdina dela, baina ondo daude. Nik bota diodan gazi horrekin puntu oso polita hartu du. Ez diot gehiegi sartu nahi izan; jendeak proba dezala. Sagardo desberdinak egin litezkeela erakutsi nahi dut, beste puntu bateko sagarrarekin. Hemengoarekin nahastuta, oso uztarketa ona egiten du. Jendea gustura dago, sagardo oso onak daudela esaten didate, kolore ona, edan erraza eta puntu polita. Oso pozik nago.
Jose Antonio Olano, Altzagako Olagikoa./Aimar Maiz
Denboraldia: Guk urte guztian lana egiten dugu. Orain segitu egiten dugu. Sagardoarekin hasi gara, menua sagardotegikoa jartzen dugu, baina aparte arraina-eta izaten da. Ez gara lotu-lotuak sagardotegira, aukera pixka bat jartzen dugu, jendearen eskaerak eta hartzeko.
