Aralarko larreen irekiera festa egingo dute bihar Larraitzen
Abere erakusketa, salmenta postuak, bertsolariak, aizkora erakustaldia eta erromeria izango dira .17.000 ardi, 860 behi eta 720 behor igoko dituzte larreetara.
Maiatzaren lehen egunean, bihar, Aralarko larreetara igoko dituzte abereak inguruko abeltzainek. Eguerdian egingo dute larreen irekiera. Aurten 17.000 ardi eta 720 behor eramango dituzte, aurreko urteetan baino gutxiago. Behiak, berriz, gehiago izango dira, 860 buru. Larreen irekiera ospatzeko, egun osoko egitaraua antolatu du Aralar-Enirio Mankomunitateak Larraitzen.
Abereak larrera nola igotzen dituzten ikusteko aukera izango da. / Aimar Maiz
Egitaraua
10:00. Postuen irekiera eta trikitilariak. 12:00. Aralarko larreak irekitzeko suziria. Ondoren, Nabarralde taldearen emanaldia. 12:30. Kantaldia Arantxa, Ainhoa eta Maider Ansa ahizpen eskutik. 13:00. Aizkora erakustaldia. Joxe Mari Esnaolak bost metroko garaieran kokatutako enborra moztuko du. Ondoren. Bertsolariak. Mikel Mendizabal eta Bixente Goristidi. 17:00. Erromeria. Jesus Mujika eta Josu Puldain.
