Familientzako orientazio joko berria egin dute Mutiloan

Arrakasta izan du egitasmoak; 60 lagunek baino gehiagok hartu du parte.

Goierriko Hitza

2015/05/30

Haurrak galderen erantzuna bilatzen.

Nazioarteko Bide Berdearen eguna aitzakia hartuta, familientzako orientazio joko ludiko berria estreinatu dute Goiturrek, Zumalakarregi Museoak eta Ormaiztegiko eta Mutiloko udalek. Eguraldia lagun, familia ugari elkartu da Mutiloako plazan, jokoari hasiera emateko. 60 lagunek baino gehiagok zuten izena emanda, baina azkenean gehiago ere izan dira parte hartu dutenak. Ibiltariek mapa eta arkatz bana hartu eta Mutiloa eta Ormaiztegiko Bide Berdearen inguruan osatu dute 5,5 kilometroko ibilbide zirkularra. Kirola eta aisia uztartzen dituen eskaintza berri horretarako, 10 baliza jarri dituzte, eta parte hartzaileek bertan galderak aurkitu ahala erantzun behar zituzten. Probaz proba lortutako hizkiekin, ezkutuko hitza asmatzea zen erronka. Behin ibilbidea osatu eta galderak erantzunda, berriz ere Mutiloko plazaren inguruan elkartu dira ibiltariak, indarrak hartzeko askaria egiteko. Gaurtik aurrera, edonoren esku egongo da orientazio joko ludikoa egiteko aukera. Zumalakarregi Museoan eskuratu daiteke mapa.

ELKARRIZKETAK

ERREPORTAJEAK

KIROLA

Azken bideoak

Argitalpen bereziak