Zegamako Tartaloetxe elkarteak Tartalo Eguna ospatuko du bihar
Mendi irteera, herri kirol erakustaldia eta herri afaria egingo dituzte
Zegamako Tartaloetxe kultur elkarteak Tartalo Eguna ospatuko du bihar. Egun osoan egongo dira ekitaldiak. Hasteko, mendi irteera egingo dute. Mendizaleak 09:00etan irtengo dira, herriko plazatik. Tartaloetxe trikuharrira joango dira. Arratsaldean, 18:30ean, herri kirol erakustaldia egongo da Zegamako plazan. Iluntzean, 21:30ean, herri afaria egingo dute. Afarirako txartelak Itzala tabernan jarri dituzte salgai. Gaur da erosteko azken eguna. Helduek 15 euro ordaindu behar dute; langabetuek, 12; eta haurrek, 2.
Urtero antolatzen dute festa hau. Helburua bazkideak elkartzea da. Dena den, gainontzeko herritar guztiek ere parte har dezakete. Urtero lagun askok parte hartzen dute.
100 bazkide pasatxo
Tartaloetxe kultur elkarteak 100 bazkide pasatxo ditu eta urtero ekitaldi asko antolatzen ditu. Mus txapelketa eta bertso saioak, besteak beste. Gainera, Tartaloetxeko bazkideak arduratzen dira herriko pilota eskolaz.
