Legazpiko gaztetxea irekiko dute
Gazte Asanblada indarberrituta dator, ostiralero bilduko dira aurrerantzean
Legazpiko jaien aurretik gaztetxean gertatutakoa gertatu ondoren itxi zuten berriz irekitzeko asmoarekin. Hainbat berrikuntza eta garbiketa lanak egin dituzte (kamerinoa egokitu, gaizki zegoen materiala margotu, komunak atondu, biltegiak ustu, barrako itxura aldatu…). Lan horiek guztiak gutxi batzuren artean egin badituzte ere, Gazte Asanblada indarberritzea lortu dute bien bitartean. Asanblada hiltzorian zela jakinarazi ziete Legazpiko gazteei eta mezu hori zabaldu ondoren, gazte kuadrilla asko bildu dira ostiralero egin dituzten bileretara. Aurrerantzean ere ostiralero bilduko dira 19:00etan. Elastiko berriak egin dituzte eta irekiera festan jarriko dituzte salgai 10 euroan.
