Igor Esnaola Euskal Herriko sega finalerako sailkatu da

Euskal Herriko Trontza Txapelketan iazko hirugarren postua errepikatu du, baina denbora hobea eginda

Goierriko Hitza

2015/07/27

Igor Esnaola segalaria lan-saio batean, Alatzne Etxaburua zorrotzailea lagun duela. / I. Gurrutxaga

Igor Esnaolak legorretar segalariak aurreko bi urteetan lortutako Euskal Herriko txapela defendatuko du aurten ere. Atzo jokatu ziren Aian bi kanporaketa saio, zortzi segalari bi multzotan bananduta. Esnaola bigarren geratu zen bere txandan (949 kilo), Jesus Mari Ormaetxeak Urki irabazleak baino 30,5 gutxiago ebakita. Hirugarren Iban Pardo izan zen (923 kilo) eta Andoni Urrutia (726,5 kilo) laugarren. Horrenbestez, Urki eta Esnaola sailkatu ziren finalerako lehen kanporaketan. Bigarrenean, Julen Gabirondok (804,5 kilo) eta Jon Kaflankak (711,5 kilo) lortu zuten finalerako txartela. Mikel Berakoetxea (607,5 kilo) eta Iñigo Mercader (594,5 kilo) sailkatu ziren hirugarren eta laugarren. Hasiera batean, finala abuztuaren 16an jokatuko da Aian, baina belarraren egoeraren arabera litekeena da aldaketaren bat egotea. “Segan ez nintzen gustura aritu, ezin libratu, baina finalerako sailkapena lortu dugu”, adierazi du Esnaolak. Trontzan hirugarren Goizean segan aritu bazen, arratsaldean Euskal Herriko Trontza Txapelketaren finala jokatu zuen Esnaolak, Xanti Aizpurua zizurkildarra lagun zuela. Iaz bezalaxe, hirugarren postuan sailkatu ziren, Barberena anaien eta Eugi-Kañamares bikoen atzetik. Segan baino hobeto ikusi zuen bere burua Esnaolak trontzan, eta gustura dago iaz baino minutu eta zerbait gutxiago behar izan zutelako lana osatzeko.

Azken elkarrizketak

Azken bideoak

Argitalpen bereziak