Nolatan artzain?
Lanbide Heziketa ikasi nuen eta lantegi batean lan egiten dut, baina artzaintza oso gustuko dut. Kalean jaio nintzen, baina ama baserrikoa da eta bere baserrian zaletu nintzen. Ardiak, ahuntzak, behorrak eta txakurrak ditut animalia gustukoenak.
Noiz erosi zenituen lehen ardiak?
16 urterekin. Lursail bat alokatu nuen horretarako. Ondoren Urdangarin-Txiki baserria erosi nuen.
Nola ikasi zenuen txakurrekin lan egiten? Norbaitek irakatsi al zizun?
Nire kasa ikasi nuen. Txakurrak oso gustuko ditut.
Zenbat txakur dituzu?
Hamar txakur ditut. Guztiak euskal artzain txakurrak dira.
Txakurrei izena jartzen bakarrik nahiko lan hartzen duzu…
Batzuei izen bera jarri eta kito! Haitz, Ttiki, Argi, Txato, Nabar… diren nire txakurren izenetako batzuk.
Zein da zure txakur kuttuna?
Lehiaketa gehienetara Argirekin joan naiz. Dagoeneko 14 urte ditu. Legazpira berarekin eta Ttikirekin joateko asmoa nuen, baina Argi beharbada ez dut eramango. Izan ere, dagoeneko zahartuta dago eta ez du oso ondo entzuten.
Artzain batentzat txakurra ezinbestekoa al da?
Bai. Denok txakurrekin lan egiten dugu. Txakurrik gabe, ez dago ardiak etxetik ateratzerik.
Zein dohain behar ditu txakur on batek?
Ez dakit zein dohain behar dituzten, baina irakastea asko kostatzen da. Eta arraza honetakoei, gehiago oraindik. Border collie arrazakoek errazago ikasten dute, baina hemengoak lanerako hobeak direla uste dut. Ez dute nagusia alde batera uzten.
Eta artzainak zein dohain behar ditu txakurrekin lan egiteko?
Pazientzia behar du. Eta asko ibili behar da beraiekin. Nik neuk ordu asko ematen ditut txakurrekin. Hori bai, lehiaketetarako ez dut entrenatzen. Etxean sekula ez dut banderarik jarri.
Noiztik parte hartzen duzu artzain txakur txapelketetan?
1998an hasi nintzen. Beti gustatu izan zaizkit artzain txakur txapelketak. Umetan lehiaketak ikustera joaten nintzen.
Lehiaketa askotan parte hartzen al duzu?
Urtero hiruzpalau txapelketatan parte hartzen dut: Gipuzkoakoa, Ataungoa… Aurten, Herrialde Katalanetan ere izan naiz. Beste behin, Frantziara joan nintzen.
Lehiaketarik irabazi al duzu?
Iaz Oiartzungo lehiaketa irabazi nuen. Aurten bigarren postuan sailkatu naiz. Sekula ez naiz azken postuan gelditu. Horretaz oso harro nago: nire txakurrek lan duina egiten dute beti.
Legazpiko Artzain Eguna gustuko al duzu?
Bai. Halako gehiago behar dira jendeak baserrietan egiten den lana hobeto ezagutu dezan.
