Artzain Eguna ospatuko da igandean Legazpin
Iraileko lehen asteburuan oparoa agertzen da Goierriko agenda. Era askotako ekintzak izango dira datozen egunetan: antzerkia, musika, festak, irteerak…
Ordiziatik hasita, Euskal Jaiak abiatuko dira gaur bertan, eta arratsaldean bi erakusketa irekiko dira: bata 18:00etan Barrenan, Juan Mari Burgueraren eskulturekin, eta bestea D’elikatuzen, 19:00etan, baserrietako sagardogintzari buruzkoa. Gauean, 20:00etan, ‘Ez dira aspaldiko kontuak’ antzezlana eskainiko da Herri Antzokian. Bihar, ‘Emaneurre euskarari’ eguna ospatuko da, 11:00etan kuadrillen artean egingo den herri kirol jardunarekin. Bazkaria izango dute gero (14:30), eta Harri Orri Artazi txapelketa (16:30) eta euskal kantu poteoa ere bai (18:00). Igandea, jubilatuen eguna izango da: diana trikitilariekin (13:15, dantzariak eta Laguntasuna errondaila (13:15) eta bazkaria eta dantzaldia (14:50).
Urretxun musika nagusituko da. Gaur 23:00etan Alther Ego taldeak kontzertua emango du Zuhaizti tabernan, eta igandean, Aterri taldea arituko da 19:00etatik aurrera Santa Barbaran.
Zumarragan ere musika izango da nagusi, Antion zehazki. Bihar 19:30ean, Kea ahots taldearen kontzertua izango da Antioko Udako Musikaldiaren barruan.
Legazpin ere ez da musikarik faltako, eta bihar kontzertua emango dute Agurtzane eta Jon Elustondo trikitilariek Latxartegi Parkean 18:30ean hasita. Musika Parkean egitasmoaren azken saioa izango da. Igandean, berriz, Artzain Eguna ospatuko da 10:00etatik aurrera. Gipuzkoako Artzai Gazta lehiaketa, gazta eta sagardo dastaketa, ardi okela gertatze lehiaketa, ardiaren ile mozte erakusketa, artzaintzaren lehena eta oraina, artisau azoka, artzainei omenaldiak… izango dira goizean zehar, eta arratsaldez, Gipuzkoako Artzain Txakurren Txapelketa Urtatzarren.
Garagardoa izango da, bestalde, Idiazabalen errege asteburuan, areto futbol taldeak antolatu duen garagardo azokari esker. Igarondo pilotalekuan egongo da zabalik 18:00-04:00 bitartean.
Eta Zegaman, saguzarrak nagusi. Anduetza parketetxeak antolatuta, aberetxo horiek ezagutzeko irteera gidatua egingo da Kiko ALvarez gidari dela, iluntzeko 20:00etan abiatuta. Izena eman behar da aurrez.
Festak Ataun San Gregorion
Haurren eguna ospatuko da bihar Ataun San Gregorion
Asteburuko agenda ixteko, festak. Jaiak dira Ataun San Gregorion asteburu osoan. Gaur rock kontzertua, kuadrilen afaria eta Joxe Replay eta Ezten Giro taldeak izango dira. Bihar, haurren eguna ospatuko da: 12:00etan botako den txupinazoarekin hasita, eta bazkaria, puzgarri eta jolasak eta ‘Gazte konkisa’ izango dituzte; pintxo afaria eta mozorro gaua ere egingo dira. Igandean, pilota partidak eta kantu poteoa izango dira goizez, eta antzerkia eta gazta eta ardo dastaketa arratsaldez, jaiei amaiera emateko.
Beasainmendi ere jaietan izango da bihar eta etzi. Bihar, herri afaria eta mus txapelketa egingo dira, eta igandean, meza bertsolari eta trikitilariekin, auzotarrei omenaldia, herri kirol jaialdia, bazkari herrikoia, haur jolasak eta erromeria izango dira, 11:30ean hasiko den Usurbe igoera mendi lasterketarekin batera.
Liernin, azkenik, Andre Mari eguna ospatuko dute igandean. Goizean txistulariak, txirrindulari proba, toka lehiaketa, meza eta herri bazkaria izango dira, eta arratsaldez, herri kiorlak.
