Elustondo trikitilariek hartuko dute gaur Latxartegi parkea
Legazpiko Musika Parkean egitasmoaren azken kontzertua eskainiko dute 18:30ean
Elustondo anai-arreba legazpiarrek beren bakarkako lehen diskoa aurkeztuko dute gaur 18:30ean Latxartegi parkean eskainiko duten kontzertuan. Diskoan parte hartu duten hainbat musikarik parte hartuko dute emanaldian: Michel Longaronek (bateria), Amaiur Cajaravillek (kontrabaxua), Gurutz Bikuñak (gitarra akustikoa), Xabier Zeberiok (biolina) eta Estitxu Pinatxok (ahotsak). Elustondotarrek sorpresaren bat egongo dela ere iragarri dute.
Diskoa, Elustondo izenekoa, maiatzean argitaratu zuen Elkar diskoetxeak. Hamalau kanta ditu: zortzi Martin Aginagalderenak dira, bost herrikoiak eta azkena Kepa Junkerarena. Abestien hitzak Nerea Elustondok, Asier Iriondok, Xabier Amurizak, Jose Luis Padronek eta Natxo de Felipek idatzi dituzte.
Legazpik presentzia handia du diskoan: azaleko argazkia herriko sarreran atera zuten (argazkia Gorka Salmeronena da), Xabier Barriolak diskoan parte hartu du eta abesti batzuen izenburuetan Legazpiko hitzak erabili dituzte.
Gaurkoa, Musika Parkean egitasmoaren aurtengo azkeneko kontzertua da.
