Itsasondoko Urkia auzoan Gurutze festak ospatuko dituzte, larunbatetik astelehenera
Txikia da Urkia auzoa, etxe kopuruz. Etxe bakan batzuk kaskoan, ermitaren inguruan; eta baserri batzuk barreiatuta, Itsasondoko mendi-haranetan. Plazatxoa, eta lehenago apaizetxea izandako eraikinean, auzoko elkartea. Txikia, ez hala festa-aukeraz. Urtean bi ekinaldi egiten dituzte, biak Gurutzearen inguruan. Maiatzean lehenengo, eta irailean orain. Larunbatetik astelehenera prestatu dute egitaraua auzotarrek.
Otordu ugari egingo dituzte elkarteak. Larunbatean afaria, hasteko. Igandean eta astelehenean, hamaiketako eta bazkari bana. Txartelak hartzeko aurrez hots egin behar da, ostiralerako (irailak 11): 943 88 84 18. Trikitilariekin erromeriak ere ez dira faltako. Eta, iganderako, goi mailako aizkora erakustaldia, txapeldun handiak tarteko: Olasagasti, Arrospide, Larrañaga eta Ugarteburu. Xabier Aranburu Guzta idiazabaldarrak harria jasoko du.
Ohi bezala, jaietan zehar saski bat zotz egingo dute, errifak salduta. Zenbaki sariduna astelehenean 20:00etan aterako dute.
EGITARAUA
Irailak 12, larunbata
20:00. Jaien hasierako suziria.
21:00. Lagun arteko afaria.
23:00. Erromeria, Laja eta Mikel trikitilariekin.
Irailak 13, igandea
11:00. Hamaiketakoa, Antsorregi eta Olarte trikitilariekin.
14:30. Bazkaria.
18:30. Herri kirol erakustaldia. Aizkoran, Olasagasti, Arrospide, Larrañaga eta Ugarteburu. Harri jasotzen, Xabier Aranburu Guzta.
Ondoren. Erromeria, Antsorregi eta Olarte trikitilariak.
Maiatzak 14, astelehena, Gurutze eguna
11:00. Meza nagusia.
Ondoren. Hamaiketakoa, Ostolaza eta Andonegi trikitilariekin.
14:30. Bazkaria.
19:00. Erromeria, Ostolaza eta Andonegirekin.
Urkiko plaza, Gurutzeaurre etxearekin./Aimar Maiz
Hamaiketakoa, Urkiko festetan, auzoko elkartean./Aimar Maiz
