'Hemen eta orain, Beasain' bideoa grabatuko dute beasaindarrek
Udalerriaren 400. urteurreneko ekitaldien barruan antolatu dute. Ahalik eta herritar gehienek parte hartzea lortu nahi dute.
Igartzako Kultur Mahaian sortutako ideia borobilduz, Beasainen eta beasaindarren errealitatea jaso nahi dute ‘Hemen eta orain, Beasain’ bideoan. Herritarrak izango dira bideoko protagonista eta aktore nagusiak.
Bideoa lagunduko duen musika egina dago dagoeneko: Ekaitz Goikoetxeak kantaren letra egin du eta Garazi Zabaletak doinua jarri die hitzei. Abenduaren 20an, Igartza inguruan, Eñaut Tolosak eta Odei Zabaletak irudietan jasoko dute Beasaingo errealitatea.
Adin, sexu, jatorri eta pentsamolde desberdinetako beasaindarren parte hartzea lortu nahi dute Beasaingo errealitatea ahalik eta ondoen islatzeko.
Hiru hitzordu
- Azaroak 19, osteguna: 18:00etan, plazan, proiektuaren aurkezpena egingo dute, Zezilia eguneko ekitaldiak aprobetxatuz.
- Abenduak 20, igandea: grabaketa masiboa, Igartzan.
- Otsailak 5, ostirala: Estreinaldia, Usurbe Antzokian.
